Премьер-министр Кубатбек Боронов Баткен жана Жалал-Абад облусунда эпидемиологиялык кырдаал кооптуу экенин, бул аймактарда коронавирусту жуктуруп алуунун жаңы учурлары жана оорусу күчөгөндөрдүн саны төмөндөбөй жатканын айтты.
«Абалды жакшыртуу үчүн облустарга тажрыйбалуу медициналык кызматкерлерди жөнөтүү зарыл», - деди Боронов.
Түштүк аймактагы коронавирус жуккандардын жалпы саны. 21-августтагы маалымат.
- Ош облусу 3985
- Ош шаары 3372
- Жалал-Абад 3966
- Баткен 2183
Кыргызстанда коронавирус жузугуп алгандар жана андан каза болгондор тууралуу статистиканын төмөндөшүнө байланыштуу эрежелерди сактабай коюу туура эмес экенин саламаттык сактоо министринин орун басары Нурболот Үсөнбаев 20-августтагы брифингде билдирди.
Үсөнбаев коомчулукка кайрылып, оорунун күчөп кетпеши үчүн социалдык аралыкты сактоо жана беткап тагынуу маанилүү экенин белгиледи.
«Дүйнө жүзүндөгү тажрыйба жана Дүйнөлүк саламаттык сактоо уюмунун сунуштамалары боюнча баарыңыздарды сөзсүз түрдө социалдык аралык жана беткап тагынуу режимин аткарууга чакырам», - деди Үсөнбаев.
Расмий маалымат боюнча 20-августка карата вирустан каза болгондор катталган жок. Өлкөдө пандемия башталган март айынан бери вирустун курмандыктары жаңы эсеп боюнча 1054 учурда түздү.
Коронавируска каршы күрөш боюнча республикалык штаб 18-августка карата маалыматта вирус жалпы 1498 кишинин өмүрүн алганын жарыялаган. Ушул эле күнү саламаттык сактоо министринин орун басары Мадамин Каратаев онлайн басма сөз жыйынында вирустан каза болгондордун статистикасы кайра каралып чыкканын, ага ылайык 437 кишинин өлүмүнө башка оорулар себеп болгонун, сегиз учур эки жолу катталып калганын айткан.
Пандемия башталган март айынан бери COVID-19 жалпы 42 507 кишиге жукту. Анын 35 486сы айыкты.
Коронавирус жуккандардын саны азайганына байланыштуу Бишкек мэриясы бир катар чектөөлөрдү алып салды.
Троллейбус, автобус жана кичи автобустар дем алыш күндөрү да жүрө баштайт. Коомдук транспорт эртең мененки саат 7:00дөн 11:00гө чейин, түштөн кийин саат 14:00дөн 23:00гө чейин иштейт. Түшкү үч сааттык тыныгууда автоунааларга дезинфекция жасалат.
Кафе-ресторандар жана башка коомдук тамактануучу жайлар эртең менен саат 7:00дөн түнкү саат 12ге чейин ачык болот. Тамак ташып жеткирүү кызматы күнү-түнү иштей берет.
Соода борборлору, эс алуу комплекстери, дүкөндөр, супермаркеттер эртең мененки саат 7:00дөн түнкү 12ге чейин иштейт.
Сейилбактарга, парктарга, аянттарга киргизилген чектөөлөр алынып, велосипеддерди ижарага берүү кызматына уруксат берилет.
Тойканалар, түнкү клубдар, барлар, караоке-клубдар, кинотеатрлар, интернет-клубдар, компьютердик оюн жайлары жабык койдон кала берет.
Коңшу Казакстанда илимий борбор COVID-19 илдетине каршы өзү чыгарган вакцинанын клиникага чейинки баштапкы сыноолорун аяктады.
Бул тууралуу казак басылмалары Алматыдагы Биологиялык коопсуздук маселелери боюнча илимий иликтөө институтуна таянып жазышты.
19-августта аталган институт "QazCovid" деп аталган вакцина жаныбарларга жасалып, сыноодон өткөнүн жарыялады.
Борбор вакцинанын коопсуздугун, болжолдуу кесепеттерин жана аллергиялык реакцияларын ашыкча дозада сайып, текшерип көргөн.
Сыноонун экинчи баскычы октябрь айында башталат. Ага 200дөй ыктыярчы катышат.
Буга чейин Казакстандын саламаттык сактоо министри Алексей Цой өлкө күз жана кыш мезгилинде күтүлүп жаткан коронавирус эпидемиясынын “экинчи толкунуна” даярданып жатканын билдирген.
19-августа карата Казакстанда коронавирусту 103 миңден ашуун адам жугузган, алардын 1400дөн көбү каза болду.
Ал эми Пакистандын бийлиги Кытайда чыгарылган COVID-19 илдетине каршы вакцинаны өз жарандарына сыноодон өткөрүүгө макул болду.
Бул тууралуу Саламаттык сактоо боюнча улуттук институту билдирди.
Вакцинаны Бээжин биотехнология институту менен "CanSinoBio" деп аталган кытайлык компания чыгарган.
Институт билдиргендей, Пакистанда сыноонун үчүнчү баскычы өткөрүлөт. Кокус Кытай вакцинасы ийгиликтүү болуп калса Пакистан аны арзан баада, алгачкылардын катарында алат.
Эксперименталдык вакцина Кытайда, Орусияда, Чилиде жана Аргентинада сыноодон өтүп жатат. Мексика жана Сауд Арабия дагы клиникалык сыноолорго катышууну көздөп турган кези.
Расмий маалыматтарга караганда, Пакистанда 290 миң адам коронавируска кабылган, алты миңден көп киши каза болгон.
- автор Али Токтакунов
Айрым өлкөлөр карантиндик чектөөлөрдү кайра киргизди. Трамп менен Ардерн кайым айтышса, ДССУ вакцинаны тең бөлүштүрүүгө чакырды.
“Вакциналык улутчулдуктун алдын алалы”
Дүйнөлүк саламаттык сактоо уюму коронавируска каршы вакцинаны тегиз жана акыйкат бөлүштүрүүгө чакырды.
Уюмдун башкы директору Тедрос Аданом Гебрейсустун айтымында, вакцинаны эки баскыч менен бөлүштүрүү сунушталууда. Жалпы коркунучту азайтуу үчүн биринчисинде дозалар Дүйнөлүк саламаттык уюму жетектеген вакцина иштеп чыгуу планына катышкан өлкөлөргө пропорциялуу тийиши керек. Экинчисинде коркунуч көбүрөөк жана аялуу өлкөлөргө көңүл бурулушу шарт экени белгиленет.
18-августта өткөн жыйында Гебрейсус бир катаны кайра кайталабоого чакырды:
«Вакциналык улутчулдуктун алдын алалы. Буга байланыштуу Дүйнөлүк саламаттык сактоо уюму COVID-19 илдетине каршы күрөшкөн каражатка жетүүнү тездетүүнү, көбүрөөк коркунучка кабылгандардан тарта баарын жана бардык жерде жаңы табылга менен камсыздоо үчүн өкмөттөр жана жеке сектор менен чогуу иштеп жатат».
Дүйнөлүк саламаттык сактоо уюмунун COVID-19 боюнча техникалык жетекчиси Мария Ван Керхове вируска туруштук берүүнү камсыздаган антиденече айыккандардын 10% жетпеген адамдан гана чыкканын белгиледи. Андан тышкары изилдөөлөр элдин көпчүлүгү дале коронавируска чалдыгуу коркунучу бар экенин көрсөткөнүн эскертти.
11-августта Орусиянын президенти Владимир Путин коронавируска каршы «Гам-КОВИД-Вак» деп аталган алгачкы вакцина каттоодон өткөнүн билдирген. Путин вакцинаны кызы өзүнө сынап көргөнүн айткан.
Орусиянын дымагына эл аралык эксперттер сын көз караш менен карап, учурда «тез арада вакцина чыгаруу эмес, сапаттуу жана коопсуз вакцина чыгаруу зарылчылыгы турганын» белгилешкен. Ушу тапта дүйнө жүзүндө коронавируска каршы жүздөн ашуун вакцина иштелип чыгууда. Алар сыноо мөөнөтүнүн түрдүү баскычтарында турушат. ДССУ вакцинанын тийиштүү процедуралардан өтүп, жапырт колдонууга берилиши ушул жылдын аягынан эрте болбойт деп билдирген.
АКШ менен Жаңы Зеландия лидерлери кайым айтышты
АКШ президенти Дональд Трамп дүйшөмбүдө Жаңы Зеландия коронавирусту жеңдик деп жар салганын белгилөө менен бул өлкөдө вирустун “кескин тараганы абдан коркунучтуу” деп баа берген эле.
Бул сын арал өлкөнүн тургундарынын арасында нааразылык жаратып, премьер-министри Жасинда Ардерн эртеси эле жооп кайтарды:
«Карап көрсөңүз, менимче дүйнөдө COVID-19дун таралуусуна көз салып турган ким болбосун опоңой эле көрө алат. Жаңы Зеландиядагы күнүнө катталган тогуз учур менен Кошмо Штаттарындагы он миңдеген жаңы учурду салыштырып болбойт. Чынында дүйнөдөгү көп өлкө менен теңдештирүүгө мүмкүн эмес. Биздин абалды туура эмес чечмелеген кишилерди этибарга да албайм».
19-августка карата маалымат боюнча АКШда коронавируска чалдыккандар 5,6 миллиондон ашса, Жаңы Зеландияда вирус жуктурганы катталгандар жалпы жонунан 1600 ашуун гана. Ошентсе да буга чейин коронавирусту жеңгенин жарыялаган Жаңы Зеландиянын ири Окленд шаарында абал начарлап, обочолонуу режими узартылган.
Кайрадан чектөөлөр
Коронавируска каршы күрөштө ийгиликтүү саналгандардын дагы бири Түштүк Корея да жабык имаратта элүүдөн ашык адам чогултуп, иш-чара өткөрүүгө кайра тыюу салды. Анткени апрелдин башынан бери күнүнө катталгандар 70ке жеткен эмес. Өткөн апта соңунан тарта вирус жуктургандар кескин көбөйдү. 19-августта 300гө чамалуу адамдан вирус табылганын өлкөнүн саламаттык сактоо министринин орун басары Ким Каң Лип билдирди.
«Алардын ичинен 140 бейтап "Сараң Жейл" чиркөөсү менен байланыштуу. Андан тышкары биз инфекция баш калаадагы жана башка аймактардагы чиркөөлөр менен жумуш орундарында таралып жатканын көрүүдөбүз».
Коронавируска байланыштуу бир катар өлкөлөр чектөө чараларын кайрадан күчөтө баштады. Франция менен Чехия 1-сентябрдан тартып жабык коомдук жайларда сөзсүз беткап тагынууну милдеттендирди.
Коронавирус бар экенин расмий жарыялай элек, бирок бийлиги чектөө чараларын көрүп, калкты беткап кийүүгө мажбурлап жаткан Түркмөнстанда футбол боюнча өлкө чемпионаты, кубоктук оюндар жана жаштар чемпионаты токтотулду. Бул тууралуу Улуттук футбол федерациясынын сайтында жарыяланып, себеби көрсөтүлгөн эмес.
19-августка карата Борбор Азиядан Казакстанда 271, Өзбекстанда 166, ал эми Кыргызстанда 179 жаңы учур катталды. Премьер-министр Кубатбек Боронов эпидемиологиялык абалды турукташтырууга коомчулуктан жардам сурап, той-аштарды өткөрбөй кое турууга чакырды.