Европа жана Орусияда коронавирустан каза болгондордун жалпы саны 300 миңден ашты. Бул континент оорунун экинчи толкунуна кабылып, чектөөлөргө, карантинге карабай вирусту жуктургандар улам көбөйүп бара жатат.
7-ноябрга карата чөлкөмдө 300 688 адам каза болду. Өлүмдүн үчтөн эки бөлүгү Британия, Италия, Франция, Испания жана Орусияда катталууда.
Оору жуккандар көбөйгөн сайын ооруканаларда реанимациялык орундар тартыш болууда.
Германиянын Саламаттык сактоо министрлиги вирус жуккандар эки эсе көбөйгөнүн, 10 күндөн кийин реанимациялык керебеттер калбай калышы ыктымалдыгын билдирди.
Франциядагы реанимациялар 85% толду.
30 миңдей киши ооруканада, алардын 4 миңи оор абалда. Польшада ооругандар 27100 киши деп катталып, 445 адам каза болду.
Орусия коронавирус менен ооругандар боюнча дүйнөдө төртүнчү орунда турат. 1,7 миллион адам вирусту жуктурду, 6-ноябрда бир күндө эле 20 миң адамдан оору аныкталды.
Жон Хопкинс университетинин маалыматы боюнча дүйнөдө 49,2 миллион адамга оору жукту. 32,4 миллион адам айыкты, 1,24 миллион адам көз жумду.
Парламент депутаты Эмил Токтошев 5-ноябрдагы жалпы жыйында "кызыл зонада" иштеген дарыгерлер убада кылынган кенемтени ала албай жатканын айтып чыкты. Депутатка саламаттык сактоо министринин орун басары Мадемин Каратаев жооп берип, дарыгерлердин кенемте акчасы боюнча толук маалымат берди. Анын айтымында, акыркы маалымат боюнча пандемия маалында каза болгон 84 дарыгердин ичинен 28инин жакындарына 1 млн. сомдон кенемте берилди.
“200 миң сомдук кенемте алуу үчүн 2 300 медициналык кызматкерден арыз түштү. Анын ичинен 477сине төлөндү. Анткени бул жерде жети пункттан эпидиликтөөнүн негизинде кенемте берилет. Каза болгон дарыгерлердин саны 84кө жетти. Алардын 41и боюнча кайрылуу түшүп, 28 адамдын жакындарына 28 миллион сом төлөндү. Алгач 50 млн. сом бөлүнгөн. Андан кийин 178 млн. сом бөлүндү. Элден 138 млн. сом бөлүнгөн. Ал каражаттан 6 млн. сомдой калды”, – деди Каратаев.
5-ноябрда үч медициналык кызматкер коронавирусту жуктуруп алганы аныкталды. Ал эми бир суткада стационардан 5, үй карантининен 10 медкызматкер айыгып чыккан. Жалпысынан республика боюнча COVID-19 диагнозу менен 3 634 медкызматкер аныкталган, алардын ичинен 3 387 медкызматкер сакайып кетти.
Нарын облусунда 5-ноябрга карата COVID-19 вирусу алты кишиден табылды. Бул тууралуу Коронавирус менен күрөш боюнча республикалык штаб маалымдады.
Аймактардын ичинен Нарын жергеси азыркы тапта вирус эң аз аныкталган облус бойдон калууда. 151 адам менен Бишкек шаары азыр биринчи орунда, андан кийин 101 киши менен Чүй облусу турат.
Ош жана Жалал-Абад облустарында да вирус күчөп жатат.
Кыргызстанда бир суткада 535 кишиден коронавирус аныкталып, жалпы ооругандар марттан бери 61 309 адам болду. Алардын 52 343ү айыкты. 1167 киши каза болду.
Саламаттык сактоо министрлиги буга токтобогон той-топурлар менен элдин массалык чогулуусу, санитардык нормалардын сакталбай жатканы себеп болуп жатканын билдирүүдө. Оксфорд университетинин божомолу боюнча Кыргызстанда жыл соңуна чейин коронавирустан төрт миңдей киши көз жумушу мүмкүн.
Акыркы суткада коронавирус илдетине кабылган төрт киши каза болду. Алардын үчөө Бишкектин, бирөө Баткен облусунун тургуну болушкан. Бул тууралуу коронавирус менен күрөшүү боюнча Республикалык штаб кабарлады. 4-ноябрга карата COVID-19 оорусу 495 кишиден аныкталды. Илдетке чалдыккандардын көпчүлүгү Бишкекте шаарында, Жалал-Абад, Баткен, Чүй, Ош облустарында катталууда.
Маалыматка караганда илдетке чалдыккандардын ичинен 527 киши сакайып чыкты.
Саламаттык сактоо министрлиги октябрь айында митингдердин, чогулуштардын, той-топурлардын көптүгү, сасык тумоонун күчөшү менен COVID-19 вирусу да арбыганын билдирип, элди санитардык нормаларды сактоого чакырууда.
Октябрдын ортосунан тартып 118 ыкчам кеңеш берүү кызматы жана мобилдик бригадалар иштеп, айрым ыктыярчылар медициналык жардам бере баштады.
Кыргызстанда март айынан бери коронавирус менен ооругандардын жалпы саны 60 774 болду, каза тапкандар - 1163.