Бириккен Улуттар Уюму (БУУ) Кыргызстанга коронавирус пандемиясына байланыштуу түзүлгөн кризистин кесепеттерине каршы күрөшүүгө 25 миллион доллар бөлмөй болду. Кыргызстандын жана БУУнун бул тууралуу биргелешкен билдирүүсүн өлкөнүн Тышкы иштер министрлиги 13-ноябрда жарыялады.
Анда социалдык-экономикалык жөнгө салуу боюнча “жол картасы” иштелип чыкканы, жардам айыл жергесиндеги элдин аз камсыз болгон катмарына жумшалары жазылды.
Экономикалык жана экологиялык туруктуулук, социалдык биримдик жана гендердик теңдик багыттарына негизги көңүл бурулуп, жаштарга жана аялдарга жумуш берүү, азык-түлүк коопсуздугун бекемдөө, социалдык коргоо, медициналык тейлөө жана сапаттуу билим кызматтарын камсыз кылуу иши жүргүзүлөру айтылды.
Кыргыз тарап, өз кезегинде, бардык эл аралык милдеттенмелерин аткарууну, саясий жана башка багыттагы реформаларды ишке ашырууну уланта турганын билдирди.
Быйыл коронавирус пандемиясы башталгандан кийин кайра саналган бюджеттин таңкыстыгы 28-30 млрд сомду түзөрү белгилүү болгон. Президенттин милдетин аткарып жаткан өкмөт башчы Садыр Жапаров парламенттин 14-октябрдагы отурумунда дефицит 42 млрд сомго чейин жетиши ыктымал экенин айткан.
Коронавируска каршы республикалык ыкчам штабдын бүгүнкү, 13-ноябрдагы маалыматына караганда, кечээтен бери бул илдеттен эки киши каза болду. Көз жумган бейтаптардын бирөө Бишкек шаарынын, бирөө Баткен облусунун тургуну болчу.
Жалпысынан көз жумгандардын саны 1195 адамга жетти.
Соңку бир күн ичинде вирус дагы 567 адамдан табылды. Алардын эң көбү Бишкек шаарында жана Жалал-Абад, Чүй, Ош облустарында.
Оору жуккандардын жалпы саны 65 454 кишиге жетти.
Бир күндө 483 адам айыгып чыкты. Азыр ооруканада 3347 адам жатат, дагы 3916 бейтап үйдөн дарыланууда.
Коронавирус жуккан медицина кызматкерлеринин жалпы саны 3677 адамга жетти, алардын 3473ү айыгып чыкты. Соңку күндө бул оору 15 дарыгерден табылды.
Кыргызстанда март айынын этегинде башталган эпидемия июль айында курчуп, көп киши каза болгон. Сентябрдын башында каза болгондор катталбай калган. Оорунун экинчи толкуну октябрда башталды.
Нью-Йорк штатында коронавируска каршы чаралар кайрадан катаалдаштырылды. Губернатор Эндрю Куомо 13-ноябрдан баштап ресторан-барлар, спорт залдар кечки саат 10до жабылууга тийиш, 10дон көп киши чогулбашы керек деп билдирди.
Нью-Йорк шаарынын мэри Билл де Блазио жаңы чараларды эпидемиянын экинчи толкунун токтотуу үчүн акыркы мүмкүнчүлүк деп сыпаттады.
Нью-Йорк жазында пандемиянын АКШдагы очогу болгон. Ошондо күнүнө миңдей киши коронавирустан каза болчу. Июль айынан бери штат жана шаар вирустун жайылышын көзөмөлдөп, өлгөндөрдүн саны күнүнө ондун айланасында болуп турду. Бирок сентябрдын ортосунан бери коронавируска чалдыккандар АКШда көбөйө баштады. Ноябрдын биринчи күндөрүнөн тартып коронавирус күнүгө 100 миң кишиден аныкталып келатат.
Нью-Йоркто 10-ноябрда 164 миң тест жасалса, алардын 2,9% позитивдүү болуп чыкты. Бул көрсөткүч 5 же андан көп пайыз болсо, жогору болуп эсептелет. Губернатор Эндрю Куомо жаз айларындай болуп толук карантин киргизүү эң акыркы чара болорун айтты.
АКШда бир катар штаттар беткап тагынууну милдеттүү кылса, Нью-Жерси жана Миннесотада айрым мектептер кайрадан аралыктан окууга өтүүдө.
COVID-19га чалдыгып, ооруканаларга жаткырылгандардын саны да рекорддук чекке жетип турат. Ушу тапта күнүнө орто эсеп менен миңдей киши оорунун айынан дүйнө менен кош айтышууда. Пандемия башталгандан бери Кошмо Штаттарда коронавирустан 241 миңден көп киши каза тапты.
Эксперттер кышында абал мындан да начарлашы мүмкүн деп эскертишүүдө.
Эпидемиянын экинчи толкунун башынан кечирип жаткан Европа өлкөлөрүндө коменданттык саат, карантин жана башка чаралар көрүлгөн.
Украинанын президенти Владимир Зеленский жана анын кеңсесинин башчысы Андрей Ермак коронавирустан улам ушул жуманын башында оорукана жаткырылды.
Бул тууралуу Ермактын кеңешчиси Михаил Подоляк 12-ноябрда «Украинская правда» интернет-басылмасы менен болгон маегинде билдирди. Анын айтымында, Зеленский жана кеңсе башчысы Киевдеги «Феофания» клиникалык ооруканасында дарыланып жатат.
«Ал жерде президентке жыйындарды өткөрүш үчүн атайын бөлмө даярдалган. Бүгүн ал бир топ онлайн-жыйындарды өткөрдү», - деп билдирген Подоляк.
Ал эми Ермак болсо өзүнчө бөлмөдө дарыланып жатат.
Зеленскийдин басма сөз кызматы президент коронавирус жугузуп алганы аныкталган соң алгач үйүнө барып, бирок кийин толугу менен обочолонуу максатында ооруканага жатканын билдирди.
Владимир Зеленскийдин абалы жөнүндө басма сөз катчысы Юлия Мендел: «Бейтаптар үчүн бардык шарттар бар. Тынчсызданчу эч кандай олуттуу жагдай жок», - деп билдирди.
Владимир Зеленскийдин коронавирус жугузуп алганы 9-ноябрда белгилүү болгон. Андан көп көтпөй анын кеңсесинин башчысы Андрей Ермактын да илдетке кабылганы кабарланган.
Украинада президенттен башка бир топ жогорку жетекчилер СOVID-19 вирусун жугузуп алганы кабарланды. Алардын ичинде финансы министри менен коргоо министри да бар.
12-ноябрда бул өлкөдө 11057 адамдан вирус аныкталып, 198 адам каза болгону маалымдалды. Бул өлкөдөгү ооруну жугузгандардын саны боюнча рекорддук көрсөткүч.
Украинада жалпысынан жугуштуу илдеттерди жугузгандардын саны 500 865 адамды түзүп, анын кесепетинен 9145 адам өмүр менен кош айтышты.