Кырдаалга байланыштуу 4-июлда президент Сооронбай Жээнбеков саламаттык сактоо министри Сабиржан Абдикаримов менен онлайн-кеңешме өткөрдү. Анда дарыгерлерди мобилизациялоо маселеси талкууланды.
Президенттин басма сөз кызматынын кабарлашынча, саламаттык сактоо министри Сабиржан Абдикаримов медициналык факультеттердин жогорку курстарынын 70ке жакын студенти ишке, дагы 30 студент "Тез жардам" кызматына тартылганын маалымдаган.
3-июлда Бишкектеги медицина кызматкерлерине көмөк көрсөтүү үчүн аймактардан 100гө жакын ыктыярчы-дарыгерлер тартылды. Алар борбор калаанын медицина кызматкерлери жетишпеген ооруканаларына бөлүштүрүлөт. Бир бөлүгү 118 кеңеш берүү кызматынын ишине тартылары айтылды.
Бишкектин мэри Азис Суракматов өпкө оорусу күчөгөнүнө байланыштуу ИВЛ жана кычкылтек концентраторлору тартыш болуп жатканын билдирди.
Ал учурдагы ишкерлерди кыйын кырдаалда керектүү медициналык жабдыктарды сатып берүүгө чакырды.
“Биз ИВЛ аппараттар жана кычкылтек концентраторлору жетишпей жатканын моюнга алууга мажбурбуз. Ошондуктан, чакан жана орто бизнестин өкүлдөрү, меценаттар жана ишкерлерге кайрылам. Адамдын өмүрүн сактоо үчүн керектүү жардамды көрсөтүңүздөр”, - деп билдирди Суракматов.
3-июлда Өзбекстан Бишкекке 100 ИВЛ жөнөткөнү кабарланган.
Мындан тышкары Кызыл жарым ай коому Токмоктогу аймактар аралык ооруканасына эки жасалма дем алдыруучу аппарат алып берген.
4-июлда Түркиянын Стамбул шаарындагы мекендештер Бишкекке 15 кычкылтек концентраторун жөнөттү. Алар медициналык бул жабдыкты өз каражатына сатып алышкан.
Коронавируска каршы республикалык ыкчам штабдын кабарлашынча, 4-июлда өпкөсүнөн кагынып, ооруканада дарыланып жаткандардын 31и каза болду.
2122 бейтап өпкөсүнөн кагынып (пневмония) ооруканада дарыланууда, анын 496сынын абалы оор, 153ү реанимацияда.
Жалпысынан март айынан бери бул илдетке чалдыккандардын саны 3009 болду, алардын 736сы айыгып чыкты.
Кыргызстандын башкы өпкө дарыгери Талантбек Сооронбаев "Азаттыкка" берген интервьюсунда буга чейин жай айларында пневмония менен ооругандар мынчалык көп катталбаганын, өлкөдө сасык тумоо эмес эле COVID-19 пандемиясы гана өкүм сүрүп жатканын айткан.
5-июлга карата Кыргызстанда коронавирус жуктуруп алган 283 адам жаңы аныкталды. Бул тууралуу Коронавируска каршы күрөшүү боюнча республикалык штабдан кабарлашты. Муну менен өлкө боюнча СOVID-19 вирусун жугузгандар жалпы 7377 адамды түзүүдө. Ал эми сутка ичинде 88 адам ооруканадан чыгарылды. Азыркы күнгө карата 2802 адам коронавирусту жеңди.
Маалыматка ылайык, акыркы суткада вирус аныкталган адамдар эң көп Бишкек шаарында катталып, 162 адамды түздү. Чүй облусунда 31, Ош шаарында 27, Ош облусунда 13, Нарын облусунда 18, Баткен облусунда 13 жана Ысык-Көл облусунда 19 адамдан вирус табылды.
Коронавирус дагы 32 медициналык кызматкерге жукканы белгилүү болду.
Дүйнөлүк саламаттык сактоо уюму акыркы суткада коронавирус жуктуруп алгандардын саны рекорддук чекке жеткенин кабарлады. Маалыматка ылайык, соңку бир күн ичинде дүйнө жүзүндө 212 326 адамдан вирус аныкталган. Вирус эң көп катталган өлкөлөрдүн сап башында АКШ, Бразилия, Индия турат. Буга чейинки рекорддук көрсөткүч 28-июнга туура келген. Анда 189 миңден ашык адамдан вирус аныкталган болчу.
Ал эми акыркы 24 саатта беш миңдей адам пандемиядан улам каза болду.
АКШдагы Жон Хопкинс университетинин маалыматы боюнча дүйнөдө коронавирусту 11 миллион 200 миңдей киши жугузуп алды. Анын ичинен 530 миңден ашык бейтап ажал тапты. Пандемия акыркы учурда Латын Америкасында тездик менен жайылууда. Муну менен катар Түштүк Африкада, Индияда жана Жапониянын айрым аймактарында көбүрөөк катталып жатат.
4-июлда Орусияда коронавирустан каза болгондордун саны 10 миңден ашты.
Ал эми абал турукташкан Британияда ишембиден тарта чач тарач, музей, ресторан, кинотеатрлар ишин жандантты. Өлкөнүн премьер-министри Борис Жонсон британиялыктарды санитардык эрежелерди унутпоого чакырды.