Кыргызстандын чет мамлекеттердеги элчиликтери жана башкы консулдуктары өлкөнүн Саламаттык сактоо министрлигине 49 кычкылтек концентраторун тапшырышты. Бул жабдуулар мекемелердин жеке каражатына алынган.
49 кычкылтек концентраторунун 15и президенттик жана өкмөттүк иш башкармалыгынын клиникалык ооруканасына тапшырылды. Калгандары Саламаттык сактоо министрлигине өткөрүлүп берилди. Министрлик аны муктаждыгына ылайык өлкөдөгү бейтапканаларга бөлүштүрүп берет.
29-августта COVID-19 дартынан жана пневмониядан каза болгондордун жаркын элесине арналган «Эскерүү шамы» акциясы болот. Коронавирус инфекциясынан каза болгондорду шам жагып, эскерүү демилгесин Бишкек мэриясы көтөргөн.
Демилгечилер кечки саат 21:30да электр жарыгын өчүрүп, терезени ачып, шам жагып, каза болгондорду эскерүүнү сунушташууда.
Акыркы бир сутка ичинде Кыргызстанда COVID-19 U07.1 жана U07.2 илдети лабораториялык жактан тастыкталган 108 учур жаңыдан катталды. Анын ичинен басымдуу бөлүгү Жалал-Абад облусунда - 33 адам вируска чалдыкты.
Бишкек шаарында - 17;
Ош шаарында – 2;
Чүй облусунда – 11;
Ош облусунда – 12;
Талас облусунда - 6;
Нарын облусунда – 1;
Ысык-Көл облусунда – 10;
Баткен облусунда - 16.
Ушуну менен жалпы пандемия башталгандан берки убакта коронавируска чалдыккандардын саны 43 820 адамга жетти.
Ал эми акыркы суткада оорудан 225 адам айыгып чыкты. Жалпы сакайгандардын саны 38 198 адам коронавирусту жеңип, айыгып кетти.
30-августка карата COVID-19 вирусунан Ош облусунда бир адам кайтыш болду. Оорудан көз жумгандардын жалпы саны - 1059 адам.
АКШдагы Хопкинс университетинин маалыматына караганда, 30-августка карата жалпы дүйнө жүзүндө COVID-19 вирусуна чалдыккандардын саны 25 миллион адамдан ашты. Буга Индияда акыркы суткада оору жуктургандардын саны рекоррдук чектен ашып, 78 761 адам жаңы катталганы негиз берди. Индия оору жуктургандарын саны жагынан үчүнчү орунда турат. Биринчи орунда АКШ, андан кийин Бразилия.
Америкада коронавируска чалдыккан адамдардын саны 6 миллион 139 миңден ашты. 3,4 миллион адам оорудан айыкты. 186 миңден ашуун адам илдеттен көз жумду.
Бразилияда 3,8 млн. адам коронавируска кабылган. 3 миллиондон ашык адам сакайып чыкты. 120 498 адам илдеттен көз жумду.
Индияда 3,5 миллион адам вирус жуктурган. 2,7 млн. адам айыгып, 63 миңден ашуун адам вирустан көз жумган.
Университеттин маалыматы боюнча дүйнөдө пандемия башталгандан бери коронавируска чалдыгып, каза болгондордун жалпы саны 846 миң адамдан ашты.