Машыгуунун негизги бөлүгү бейшемби күнү Норвегияда башталарын НАТОнун баш катчысы Йенс Столтенберг бүгүн, 24-октябрда билдирди.
- Бул "кансыз согуш" доору аяктагандан берки НАТОнун эң чоң машыгуусу. Ага 65 кеме, 250 учак, 10 миң транспорттук каражат, 50 миң адам тартылат. Машыгууга НАТОнун курамындагы 29 өлкө жана биздин өнөктөштөрүбүз – Финляндия менен Швеция да катышат, - деди Столтенберг Брюсселде сүйлөгөн сөзүндө.
2014-жылы Крым жарым аралын каратып, Украинанын чыгышындагы куралдуу жикчилдерге колдоо көрсөткөнү үчүн Батыш менен мамилеси бузулган Москва НАТОну "Орусиянын чек арасына жылып келе жатат" деп сындап келет.
24-октябрда Орусиянын коргоо министри Сергей Шойгу Минскте Беларустун коргоо министри менен өткөргөн басма сөз жыйынында "биздин чек арабызда НАТОнун ыкчам жана согуштук даярдыгы кеңейүүдө. Уюмга кирген мамлекеттер чабуул жүргүзүү максаттарын сынап көрүп жатат" деп билдирди.