Москванын мэри Сергей Собянин эки дрон атып түшүрүлгөнүн билдирди.
Ал 25-августта билдиргендей, Москваны көздөй учурулган дрондор кулаган жерде тийиштүү кызматтар иштеп жатат.
Америкадагы православ чиркөөсүнүн иерархы Аляскада орус президенти Владимир Путин менен жолугушканы үчүн кечирим сурады.
Ситка жана Аляска архиепискобу Алексийдин кайрылуусу АКШдагы православдар чиркөөсүнүн расмий сайтында жарыяланды. Чиркөөнүн башчысы, митрополит Тихондун атына жолдонгон кайрылууда Алексий "анын жоруктарынан жапа чеккендерден, азап тарткандардан чын дилден кечирим сурай турганын" айткан.
Архиепископ Путин менен тынчтыкка умтулат деген ойдо жолугушканын, бирок көптөгөн эл аны орус президентинин бетине Украинага тынчтык керектиги тууралуу эч нерсе айта албады деп айыптап жатканын белгиледи. Архиепископ АКШдагы православ чиркөөсү Орусиянын Украинага басып киргенин буга чейин бир нече жолу айыптаганын, азыр деле анын позициясы өзгөрбөгөнүн айтты.
"Мен өзүм түрткү болгон жаңжал үчүн абдан өкүнөм", - деди Алексий.
Митрополит Тихон өз кайрылуусунда архиепископ Путин менен Синоддун макулдугусуз, өзүнүн демилгеси менен жолугушканын, чиркөө мурдагыдай эле согушту айыптап, аны тез арада токтотууга чакырарын белгиледи.
Архиепископ Алексий Путин менен 15-августта анын Анкориждеги сапарында советтик учкучтардын мүрзөсүнө гүл койгону барганда жолугушкан. Орус президенти ал жайга АКШ президенти Дональд Трамп менен жолугушкандан кийин барган.
Дин кызматкери ага аляскалык Германдын иконасын белек кылып, Путинден белекке эки икона алган. Америкадагы православдар чиркөөсү автокефалдык же көз карандысыз болуп саналат. Ал Орус православ чиркөөсүнө жана башкаларга көз каранды эмес.
Чиркөө коомунун мүчөлөрү - АКШ жана Канаданын православ динин туткан жарандары, арасында Украиндан чыккандар да бар.
Ишембиде Орусиянын Санкт-Петербург шаарына, Ленинград облусуна дрон чабуулу болду. Аймактын бийлиги облустун үстүнөн алты, Петербургдан эки дрон атып түшүрүлгөнүн билдирди.
Петербургдун бийлиги Красносельский районунда жок кылынган дрондун сыныгы турак жайга тийип, терезелери күбүлгөнүн айтты. Жабыркагандар тууралуу маалымат түшкөн жок.
"Фонтанка" жазгандай, акыркы жолу учкучсуз аппараттар Петербургга чейин 2024-жылдын октябрында жеткен.
Ишембидеги чабуулдан улам Пулково аэропортунда каттамдар жапырт кармалды. Аба майдан кечке жуук гана ишин жандантты.
Москванын мэри Сергей Собянин башкалааны көздөй учурулган дрон атып түшүрүлгөнүн жарыялады.
23-августта Казан, Нижний Новгород, Тамбов, Самара, Калуга жана башка шаарлардын аэропортторунда да иш чектелип, каттамдар кармалды.
Орусиянын Юстиция министрлиги “чет элдик агенттердин” тизмесин толуктады. Бул жолу ага Кремлдин саясат таануучусу Сергей Марков да кошулду. Ал өзү тизмеге түшүнбөй турганын айтты:
"Бул жалаа.Биринчиден, мен чет элдик агент эмесмин. Экинчиден, менин эч кандай байланышым жок. Ооба, кээде алар балким ката кетириши мүмкүн. Мен бул боюнча эч нерсе билбейм", - деди Марков.
Кремлчил саясат таануучу Сергей Марков Орусиянын мамлекеттик каналдары менен радиолорундагы коомдук-саясий ток-шоулорго катышып турчу. Июлда ал Азербайжанда өткөн Шуша глобалдык медиа форумуна катышып, азери президенти Илхам Алиев тууралуу жакшы пикир айткандан кийин орусиялык өкмөтчүл блоггерлерден сынына кабылган.
Аталган тизмеге Марковдон тышкары музыкант Дмитрий Нюберг, дин кызматкери Андрей Кордочкин, Бурятиянын көз карандысыздыгын жактаган активист Раджана Дугарова, "Тамиздат" долбоору, AлифTV да кошулду.
Орусияда “чет элдик агенттер” мыйзамы 2012-жылы пайда болгон.
Сергей Марков Орусия Украинага басып кирген 2022-жылга чейин "Свобода" радиосунун эфирлерине катышып келген.