Украинанын Аба күчтөрүнүн командачылыгы 27-августка караган түнү Херсон, Полтава, Сумы облустарына орус армиясы 95 дрон учурганын, алардын 21и ар кайсы аймактарга кулаганын билдирди.
Херсон облусунда бейшембидеги чабуулдардан үч киши каза болгону, он чакты киши жараат алганы такталды. Полтава облусунун бийликтери чабуулдан айрым өкмөттүк имараттар, энергетика сектору жабыркаганын билдиришти.
Сумыда турак жай, жолдор талкаланып, бир нече киши жараат алды. Шаршембиде Донецк облусундагы шахтага тийген дүрмөттөн бир жумушчу каза болуп, үчөө ооруканага жеткирилген.
Украинанын бийлиги 26-августта мамлекеттик чек арадан өтүү тартибин жаңылады. Премьер-министр Юлия Свириденко билдиргендей, эми 18 жаштан 22 жашка чейин жигиттер согуштук абал мезгилинде чек аралардан тоскоолдуксуз өтсө болот.
"Бул чечим ар кандай себептер менен өлкө сыртында калган жарандарга да тиешелүү. Биз украиналыктар Украина менен байланышта болушу керек деп эсептейбиз", — деп жазды ал Телеграм-каналына.
Орусия Украинага басып кирген 2022-жылдын февралынан кийин Украинада 18 жаштан 60 жашка чейинки эркектердин чет жакка чыгышына тыюу салынган.
Көп балалууларга, ыктыярчыларга, тажрыйба алмашкан студенттерге, дарыланууга бараткандарга жана башка жүйөлүү себептери барларга гана сыртка чыгууга уруксат берилген.
Мындай чечим мобилизацияны жана жарандардын мамлекетти коргоо боюнча конституциялык милдетин аткаруусун камсыздоо максатында кабыл алынган.
АКШ Украинадагы согуш 2025-жылдын аягына чейин токтойт деп үмүттөнөт. Бул тууралуу президент Дональд Трамптын кабинетинин жыйынында АКШнын Украина боюнча чабарманы Стивен Уиткофф билдирди.
Орусия менен сүйлөшүүлөргө катышып, орус президенти Владимир Путин менен бир нече жолу жолугушкан Уиткоффтун айтымында, ушул аптада америка тарап Украинадагы жана башка жаңжалдарды жөнгө салуу боюнча жолугушууларды уюштурат.
Ал башка жаңжалдар деп Газадагы согушту, Израил менен Ирандын ортосундагы конфликтти атады.
"Биз аларды быйылкы жылдын аягына чейин жөнгө салууга үмүттөнөбүз",— деди Уиткофф.
АКШ президенти Украинадагы согуш тезирээк токтойт деп ишеним артарын айтып, так дата атаган жок. Эгерде Путин тынчтыкка умтулбаса, Орусияга каршы экономикалык санкцияларды салууга даяр экенин билдирди.
Ал Украина менен Орусиянын башчыларынын көзмө-көз сүйлөшүүсүнө жетишерин, анткени ошону менен баарына чекит коюуну каалай турганын кошумчалады.
Журналисттин Путин украин президенти Владимир Зеленскийди легитимсиз деп эсептеп, жолугушууну каалабай жатканы тууралуу суроосуна Трамп:
"Алар айта берет. Анын баары болбогон кеп. Баары публикага гана ойноп жатат", - деп жооп берди. Зеленский да "күнөөсүз эместигин", андан тынчтыкка умтулуу көрүнбөй жатканын, санкция менен бажы төлөмдөрү бир гана Орусияга эмес, Украинага да тиешелүү болорун белгиледи.
Трамп президенттик кызматка киришкенге чейин жана андан кийин согушту кыска аралыкта токтотууга кудурети жетерин айткан.
Украинанын Куралдуу күчтөрүнүн Башкы штабы Днепропетров облусунун аймагында калктуу пункттар үчүн салгылашуу болуп жатканын ырастады.
Бирок Орусиянын армиясы облуста эки кыштакты басып алганы тууралуу маалыматтарды четке какты.
Башкы штабдын шейшембидеги маалыматына караганда, украин жоокерлери Запорожье жана Новогеоргиевка айылдары үчүн салгылашууда.
Эки айыл Днепропетровдун чыгышында, Донецк облусу менен чек арага жакын жайгашкан.
"Украин күчтөрү орусиялык баскынчылардын алга жылуусун токтотуп, Запорожье айылын көзөмөлдөөнү улантууда", - деп жазылган маалыматта. Мындан тышкары Новогеоргиевка кыштагынын аймагында айыгышкан кармаш уланып жатканы кошумчаланган.
Буга чейин Башкы штаб орусиялык жана украиналык булактардын Днепропетров облусунун аймагындагы кармаштар тууралуу маалыматтарына комментарий берген эмес, аймакка орусиялык диверсиялык топтор кирип кетип жатканын моюнга алган.
Украиналык DeepState долбоору буга чейин орус армиясы Днепропетровдун аймагында согуштук аракеттерди жүргүзүп жатканын жазган.
Орусиянын Коргоо министрлиги аталган облустагы бир нече калктуу пункттарды, анын ичинде Запорожье менен Новогеоргиевканы алганын жарыялаган. Аталган чакан айылдар согуш тилкеси өткөн аймактарда, Запорожье, Донецк, Днепропетров облустары кесилишкен жерде жайгашкан, ал жакта чоң шаар-кыштактар жок.