Украинанын Башкы штабы 30-августка караган түнү Орусиянын Краснодар жана Сызрандагы эки мунай заводуна дрондор менен сокку урганын жарыялады.
Маалыматта сокку "душмандын чабуул коюу потенциалын азайтуу, күйүүчү май жеткирүүгө бөгөт коюу" максатын көздөй турганы айтылат. Бутага алынган ишканаларда жарылуу жана өрт болгону жазылган.
Украин тараптын маалыматына караганда, Краснодардагы мунайды кайра иштетүүчү заводу жылына үч миллион тоннага чейин мунай өндүрөт, орус армиясын күйүүчү май менен камсыздоодо колдонулат.
Сызрандагы заводдун кубаттуулугу жылына 8 жарым миллионго жакын тоннаны түзөт.
Краснодар крайынын башчысы мунай заводуна дрон сыныктары тийип, өрт чыкканын ырастады. Расмий маалыматка караганда, технологиялык жабдыкка зыян келтирилип, 300 чарчы метр аянтты өрт чалды. Жабыркагандар тууралуу маалымат жок.
Украинанын президенти Владимир Зеленский “Украин элинин улуттук эс тутуму мамлекеттик саясаттын негиздери жөнүндө” мыйзамынын негизинде “рашизм” түшүнүгүн расмий бекитти. Мыйзамды Жогорку Рада 21-августта жактырган.
Бул мыйзамда “рашизм” деген түшүнүккө төмөндөгүдөй аныктама берилген:
"Мамлекет-агрессор (Орусияда) режиминин негизин түзгөн, тоталитардык идеологиянын жана тажрыйбанын жаңы түрү. Ал орус шовинизминин жана империализмдин салттарына, СССРдеги коммунисттик режимдин жана улутчул социализмдин (нацизмдин) тажрыйбаларына негизделет".
Мыйзамда ошондой эле украин тилин жана маданий мурастарды коргоо Украинанын улуттук коопсуздугунун маанилүү бөлүгү катары бекитилген.
“Украинага 2014-жылдын февраль айында башталган куралдуу агрессияда баскынчылык кылган мамлекет тарыхый окуяларды бурмалап, манипуляция кылууда. Орусия куралдуу агрессиясы аркылуу украин элин өз тарыхынан ажыратууга аракет кылууда”, - деп жазылган мыйзамда.
Мындан тышкары мыйзамда “Украинанын көз карандысыздыгы үчүн согуш”, “Улуттук эс тутум”, “Тарыхый антиукраиналык пропаганда”, “Украин элине каршы кылмыштар” деген жоболор бар. Жаңы кабыл алынган документке ылайык, Украина тууралуу илимий изилдөөлөрдү жүргүзүп, бул өлкөнүн тарыхын кеңири жайылтууга мамлекет ар тараптуу колдоо көрсөтөт.
"Рашизм" термини 2008-жылы Орусия менен Грузиянын урушу учурунда пайда болгон. Кийин Орусия Украинага кол салгандан тарта бул сөз кеңири колдонула баштаган.
Орус армиясы 30-августка караган түнү Украинанын Запорожье шаарына сокку уруп, андан бир киши каза тапты, 22си жараат алды. Жараат алгандардын арасында үч бала бар.
Украинанын чукул кырдаалдар кызматы эртең менен куткаруучулар беш кабаттуу эки үйдө, беш жер тамда, кафеде жана техникалык тейлөө станциясында чыккан өрттү өчүргөнүн кабарлады.
Маалыматка караганда, жараат алган сегиз киши ооруканага жаткырылды, алардын үчөө 9, 10 жаштагы балдар жана 16 жаштагы кыз.
Орусиянын Коргоо министрлиги ишембиге караган түнү Украина 87 дрон менен чабуул койгонун, анын баары кармалып, жок кылынганын билдирди. Маалыматта дрондордун көбү - 30у Кара деңиз акваториясында атып түшүрүлгөнү белгиленген.
Калганы Ростов жана Краснодар аймагын бутага алганы айтылды. Мекеменин күнүмдүк маалыматында дрондор түндө Орусиянын он аймагында жок кылынганы жазылган.
28-августта Орусия Киевди жапырт аткылап, андан каза болгондор акыркы маалыматтарга караганда 25 кишиге жетти. Арасында төрт бала бар.
Орусиянын Юстиция министрлигинин маалыматына караганда, “чет элдик агент” тизмесине киргендердин катарында публицист, блогер Анатолий Несмиян, юрист Борис Кузнецов, активисттер Ирия Везикко жана Юрий Бобров жана журналисттер Олеся Кривцова менен Евгений Кротенко бар.
Министрликтин маалыматында, бул адамдар Орусиянын бийлигинин жүргүзгөн саясаты, айрым чечимдери тууралуу "жалган маалыматтарды" тараткан жана "чет элдик агенттердин" контентин жаратууга же жайылтууга катышкан.
Олеся Кривцова норвегиялык Barents Observer басылмасынын журналисти. Ал 2023-жылы орус армиясын “дискредитациялоо” жана “терроризмди актоо” беренелеринин негизинде куугунтукка алына баштаганда Орусиядан чыгып кеткен.
Блогер жана публицист Анатолий Несмиян 2024-жылдын июнь айында “Экстремисттер жана террористтердин” тизмесине киргизилген. Анын айтымында, ага каршы "Терроризмди актоо" беренесинин негизинде кылмыш иши козголгон. Буга анын "Крокус Сити Холлдогу" терракт боюнча жазган посту негиз болгон.
“Чет элдик агент” түшүнүгү Орусиянын мыйзамдарына 2012-жылы киргизиле баштаган. Алгач бул макам чет элден каржылык жардам алган жана саясий ишмердүүлүк менен алектенген коммерциялык эмес уюмдарга берилчү. Кийинчерээк мыйзамга өзгөртүү киргизилип, жарандык активист, журналист, укук коргоочу жана ЖМКга карата колдонула баштаган.
2025-жылы Орусиянын Мамлекеттик Думасы "чет элдик агенттер" макамын ыйгаруу боюнча кеңири мыйзамдар топтомун кабыл алды.