Орусия 25-сентябрга караган түнү да Украинанын аймактарын куралдын түрлөрү менен бутага алганын украин Куралдуу күчтөрүнүн Аба күчтөрү маалымдады. Мекеменин Telegram баракчасындагы соңку кабарларга караганда, Винница облусунда энергетика объектилерине сокку урулду.
Аймактын аскердик администрациясынын башчысынын орун басары Наталья Заболотная чабуул таңкы саат төрттө болгонун, айрым жерлердеги энергетика ишканаларына согуштук дрон тийгенин кабарлады. Поезд жолдун ишине зыян келтирилгени да белгилүү болду.
Харьков облусунун Купянск районунда соккудан улам тутанган өрттөн бир кишинин өмүрү кыйылганын Өзгөчө кырдаалдар кызматы билдирди.
Орусия бейшембиге караган түнү Украинанын Донецк, Полтава жана Сумы облустарын да бутага алганы маалымдалды.
Согуштук дрондордун соккусуна кабылганын Орусия да билдирүүдө. Жергиликтүү маалымат каражаттары жазганына караганда, Краснодар крайындагы Белореченский районунда кеминде алты жарылуу болду.
Сочи аэропортунда түндө учууга жана конууга убактылуу чектөө киргизилди. Краснодарда жана Туапседе учкучсуз учак коркунучу жарыяланды, жергиликтүү бийлик элди зарылчылык болбосо үйдөн чыкпоого чакырды
Украинанын Аба күчтөрү 25-сентябрда Запорожье багытында Орусиянын Су-34 истребителин атып түшүргөнүн билдирди.
Маалыматта Запорожье шаарын башкарылуучу авиабомбалар менен аткылаган тик учак таңкы саат 4төр чамасы атып түшүрүлгөнү жазылган. Башка эч нерсе айтылган эмес.
Орусия тарап тик учактын кыйрашы, анын учкучунун тагдыры тууралуу маалымат бере элек.
Москва Украинанын Запорожье облусуна сокку урууда авиацияны көп колдонот. 23-сентябрга караган түнү орус армиясы Запорожьеге авиабомба таштаганда турак жайлар талкаланып, бир киши каза тапканы кабарланган.
Украинанын Башкы чалгын башкармалыгы 25-сентябрда аннексияланган Крымдагы радиолокациялык жээк станциясы менен Ан-24 үлгүсүндөгү эки жүк ташуучу учакты да жок кылганын жарыялады. Учактарды украиналык спецназ рейд учурунда өрттөгөнүн билдирди. Орусия азырынча комментарий бере элек.
Буга чейин украиналык чалгын 21-сентябрда Крымда Орусиянын үч вертолетун жана радиолокациялык станциясын жок кылганын билдирген.
Украинанын президенти Владимир Зеленский Орусиянын президенти Владимир Путин менен Казакстанда жолугууга даяр экенин АКШдагы сапары учурунда билдирди. Fox News телеканалынын эфиринде журналисттин орус-украин сүйлөшүүлөрү тууралуу суроосуна жооп берип жатып ал жолугушуу үчүн нейтралдуу аянтча катары сунушталган бир катар өлкөлөрдү атады.
"Трамптын жана менин командам, европалыктар, Макрон жана башка лидерлер, Түркиянын президенти, баарыбыз Түркия, Сауд Арабия, Катар, Европанын нейтралдуу өлкөлөрү, Австрия, Швейцарияда жолугушууну сунуштадык. Биз кайсыл жерде болсун, мисалы, Казакстанда болобу, биз даярбыз", - деди Зеленский.
Ал украин тарап эл аралык өнөктөштөрдүн катышуусунда өтсүн деген талап менен сүйлөшүүлөргө ачык экенин кошумчалады.
Мурдараак орус президенти Владимир Путин жолугушууну Москвада өткөрүүнү сунуштаган. Зеленский муну "ишке ашпаган" вариант деп атаган. Буга жооп катары Кремлдин басма сөз катчысы Дмитрий Песков РБКга курган маегинде Зеленскийдин Москвага келүүдөн баш тартканына таң калганын билдирген.
Москва жолугушууну Казакстанда өткөрүү сунушуна жооп бере элек, бирок Украинанын Швейцария жана Австрия сыяктуу өлкөлөрдө өткөрүү сунушу “кабыл алынгыс” экени белгиленген.
Астана бир нече жолу дүйнөлүк геосаясий маселелер боюнча сүйлөшүүлөрдө аянтча болуп келген. Казакстандын баш калаасында Сириядагы аскерий жаңжалды жөнгө салуу боюнча көптөгөн сүйлөшүүлөр өткөн.
Бириккен Улуттар Уюмунун Башкы ассамблеясына катышканы барган казак президенти Касым-Жомарт Токаев менен украин президенти Владимир Зеленский 23-сентябрда эки тараптуу жолугушуу өткөрүп, Украинадагы согушту токтотуу жолдорун жана келечекте Украинаны кайра куруу иштерине казак компанияларын тартуу мүмкүндүгүн талкуулашкан.
Эки лидердин беш жылдан берки алгачкы жолугушуусу толугу менен англис тилинде өткөнүн казакстандык делегация билдирген. Токаев украин тарап менен дипломатиялык алаканы улантуу зарыл экенин белгилеген.
"Слідство.Інфо" басылмасы Орусия туткунга алган украиналык журналист Виктория Рощина 2024-жылдын 19-сентябрында Пермь крайынын Кизел шаарындагы №3 убактылуу тергөө абагында каза болгонун аныктады. Буга чейин Рощина өмүрүнүн акыркы күндөрүн Таганрогдогу тергөө абагында өткөргөнү, аны 2024-жылдын 8-сентябрында камерасынан белгисиз жакка алып кетишкени маалымдалган.
"Слідство.Інфо" басылмасынын журналисттеринин колуна Рощина каза болгону тууралуу кагаздын көчүрмөсү тийген. Аны Перм шаарынын ЗАГС мекемеси берген. Документте журналист 2024-жылдын 19-сентябрында каза болгону жазылган. Бул маалыматты Украинанын Башкы прокуратурасы дагы ырастады. Викториянын сөөгүн орус бийлиги толук соттук-медициналык экспертиза жүргүзүүгө мүмкүнчүлүк берилбеген абалда Украинага өткөрүп берген.
Быйыл жазында Украинанын Ички иштер министрлиги анын сөөгү февралдын соңунда болгон репатриациянын алкагында өткөрүлгөнүн, ДНК экспертиза сөөк журналистке таандык экенин көрсөткөнүн билдирген.
Рощина "Азаттыктын" украин кызматы менен да кызматташкан, согуш тууралуу баяндап турган. 2023-жылдын август айында Запорожье облусунун оккупацияланган аймагында орус аскерлеринин туткунуна түшкөн. Таганрогдогу абактан Москвага которуп жатышканда каза болгон. Өлүмүнүн себеби тууралуу так маалымат жок.
Украинада Рощинанын өлүмүнө байланыштуу кылмыш иши козголгон. Согуш мыйзамдарынын бузулушу жана атайылап адам өлтүрүү деген негизде козголгон ишти Башкы прокуратура тергеп жатат.
Украин бийлигинин маалыматына караганда, Орусияда отузга жакын украин журналисти туткунда кармалууда.