Украинанын президенти Владимир Зеленский 28-сентябрга караган түнү Орусиянын армиясы 500гө чукул дрон, 40тан ашуун ракета менен чабуул койгонун билдирди. Киевде соккулар төрт кишинин өмүрүн алды, бир нече киши жарадар болду.
Зеленский Киев облусундагы соккунун кесепеттери тууралуу сүрөттөрдү жарыялады.
«Орустардын Украинага жапырт чабуулу 12 сааттан ашык убакытка созулду», — деди Владимир Зеленский. Анын айтымында, эртең менен да жанкечти дрондор пайда болду.
«Душмандар Киев, Запорожье, Хмельницк, Сумы жана Одесса облустарын бутага алды. Чабуулда башкалаадагы Кардиология институтунун имаратына зыян келтирилди. Киевде төрт киши өлдү, арасында 12 жашар кыз бар. Карасанатай чабуулдар иш жүзүндө БУУнун Башкы ассамблеясынын жыйыны аяктаар менен болду, Орусия өзүнүн чыныгы позициясын ушинтип билдирүүдө», — деди Зеленский.
Ал "Москва мындан ары да согушту, кан төгүүнү улантууну кааларын" айтып, дүйнө коомчулугун ага катаал басым көрсөтүүгө чакырды. Украина Орусияга жооп иретинде чабуулдарды улантарын, муну менен ал өлкөнүн киреше булактарынан ажыратууну, дипломатияга келүүгө мажбур кылууну көздөй турганын кошумчалады.
Орусия Украинага жапырт соккулар тууралуу комментарий бере элек.
Жекшембиге караган түнү Орусиянын армиясынын Украинанын баш калаасы Киевге аба соккусунда жараат алгандардын саны өстү.
Киевдин мэри Виталий Кличко билдиргендей, жапырт аба чабуулунда жараат алгандар ооруканага түштү.
Шаардын бир нече районунда турак жайлар жана имараттарга зыян келтирилди. Абадан коргонуу системасы иштегенде дрон калдыктары Соломенск, Дарницк, Днепров жана Голосеев кичи райондоруна кулады.
Абадан коркунуч тууралуу эскертүүлөр жаңырып жатканы кабарланды.
Орусия тарап Киевге чабуул тууралуу комментарий бере элек.
27-сентябрга караган түнү Орусия Украинанын аймагына жалпысынан 115 согуштук дрон учурду. Бул тууралуу украин Куралдуу күчтөрүнүн Аскердик-аба күчтөрү билдирди.
Учкучсуз учактардын 97син атып түшүрүүгө үлгүрүшкөнү, бирок алты жерге дрон тийгени маалымдалды.
"Өткөн түнү душман Курск, Миллерово, Приморско-Ахтарск аймактарынан, убактылуу оккупацияланган Крым тараптан 115 согуштук учагын учурду, алардын 70тен ашууну Shahed дрону болду", - деп билдирди мекеменин басма сөз кызматы.
Днепропетров облусунун Синельников районунун 39 жаштагы тургуну жараат алганын, музей, магазин жана турак үй зыян тартканын жергиликтүү бийлик өкүлдөрү кабарлашты.
Дрон чабуулуна кабылганын Орусия да билдирди. Өлкөнүн Коргоо министрлигинин соңку маалыматына караганда, ишембиге караган түнү украиндердин 55 учкучсуз учагы Ростов, Брянск, Астрахан, Воронеж, Волгоград, Курск жана Белгород облустарынын аймактарынан атып түшүрүлдү.
АКШнын президенти Дональд Трамп украин президенти Владимир Зеленский менен БУУнун Башкы ассамблеясынын алкагында жолукканда америкалык курал-жарак менен Орусиянын аймагын аткылоого салынган тыюуну алып салышы мүмкүн экенин айтты. Бул тууралуу Wall Street Journal басылмасы америкалык аткаминерге жана украин бийлигинин өкүлүнө алардын атын атабастан шилтеме кылып жазды.
Ага ылайык, жолугушууда Зеленский Трамптан көбүрөөк алыска учкан ракета беришин суранып, америкалык курал-жарак менен Орусияны аткылоого салынган тыюуну алып салууну өтүнгөн. Кошмо Штаттарынын президенти мындай идеяга каршы эмес экенин айткан. Бирок басылманын булактары Зеленский мындай тыюу алынгандан кийинки кандайдыр бир жоопкерчиликти алган эмес.
Басылманын маалыматына караганда, келерки аптада украин делегациясы Вашингтонго барып Пентагондун жетекчиси Пит Хегсет менен жолугат.
Мунун алдында Зеленский Axios басылмасына курган маегинде Трамптан алыска жеткен курал-жарак сураганын ырастаган жана Трамп АКШ бул маселени карап көрөрүн айтканын билдирген.
Аталган басылма кийинчерээк өз булактарына таянып сөз эки миң чакырымга чейин жетчү “Томагавк” канаттуу ракеталары тууралуу болушу ыктымалдыгын жазды.
Мындан он күн мурда АКШ Европадагы өнөктөштөр менен макулдашылган жаңы схеманын алкагында Украинага курал-жарак жөнөтүү пакетин жактырган.
Дональд Трамп июлда Вашингтондо аскердик блоктун башкы катчысы Марк Рютте менен жолукканда Киевге абадан коргонуучу 17 "Пэтриот" системасы берилерин, алар "тез арада" майданга жеткирилерин айткан. Ачык маалыматка караганда, ушул тапта Украинада мындай жети система бар.