Кошмо Штаттар жана Батыш Европанын өкмөттөрү "Ыраазылык билдирүү" күнүнөн кийин коронавируска чалдыккандардын жаңы толкунун пайда болушу мүмкүн деп кооптонуп турушат.
26-ноябрда белгиленген бул майрамда алдын ала эскертүүгө карабастан миллиондогон кишилер жакындарын куттуктоо үчүн саякатка чыгышкан.
Мусулмандарда пайгамбар катары каралган, христиандарда кудай саналган Ыйсанын туулган күнүнө карата соода кескин жанданат, жакындардын келим-кетими көбөйөт. Бирок бул майрамга карата Европанын көп өкмөттөрү карантин шарттарын кыйла жеңилдетүүгө белсенүүдө.
Испания, Британия, Франция сыяктуу өлкөлөрдө соңку учурларда кайра киргизилген кыйла чектөөлөр майнаптуу болгондугу маалымдалды.
Орусияда коронавируска чалдыккандар кескин көбөйүп жатканына карабастан, расмий Москва жаңы кырдаалда карантиндик чектөөлөргө барган жок.
Орусияда акыркы эки күндө катары менен жаңы 27 миңден ашуун кишиден коронавирус табылгандыгы, акыркы бир күндө 510 киши кайтыш болгону маалымдалды. Жалпысынан өлкөдө 2 242 633 киши бул илдетке чалдыккан. Өлкөдө “Sputnik-V” аттуу вакцина үчүнчү баскычтагы сынактан натыйжалуу өткөнү тастыкталды.
Ал эми Австралиянын Виктория штатында чектөө киргизилген 2-августтан бери кыйла жылыштар болду. Бул штатта акыркы 28 күндөн бери бир дагы коронавируска кабылуу учуру жана анын айынан өлүм катталган жок. Эми 28-октябрдан бери бул аймакта чектөөлөрдүн бир тобу алынып салынды.
Бир сутка ичинде COVID-19 U07.1 жана U07.2 катталган жаңы учурлар:
- Бишкек - 130
- Ош - 16
- Чүй облусу – 102
- Ош облусу - 35
- Талас облусу - 17
- Нарын облусу - 11
- Ысык-Көл облусу – 33
- Жалал-Абад облусу – 50
- Баткен облусу - 29
Бардыгы болуп бир сутка ичинде катталгандар: 423
Жалпы: 71971
COVID-19 илдетинен каза болгондордун жаңы учурлары:
- Бишкек – 3
- Нарын облусу – 1
- Чүй облусу – 1
- Ош облусу – 1
Бардыгы болуп бир сутка ичинде: 6
Жалпы: 1262
27-ноябрдагы маалыматка караганда, Кыргызстанда кечээтен бери коронавирустан беш киши каза болду. Көз жумган бейтаптардын төртөө Бишкек шаарынын, бирөө Нарын облусунун тургуну болчу.
Жалпысынан көз жумгандардын саны 1256 адамга жетти.
Соңку бир күн ичинде вирус дагы 377 адамдан табылды. Алардын эң көбү Чүй облусунда (127), Бишкек шаарында (100).
Оору жуккандардын жалпы саны 71 548 кишиге жетти.
Бир күндө 402 адам айыгып чыкты. Азыр ооруканада 2875 адам жатат, дагы 3698 бейтап үйдөн дарыланууда.
Коронавирус жуккан медицина кызматкерлеринин жалпы саны 3865 адамга жетти, алардын 3576сы айыгып чыкты. Соңку күндө бул оору 7 дарыгерден табылды.
Кыргызстанда март айынын этегинде башталган эпидемия июль айында курчуп, көп киши каза болгон. Сентябрдын башында каза болгондор катталбай калган. Оорунун экинчи толкуну октябрда башталды.
АКШда коронавирустан улам бир күндө 2400дөн ашык адам каза болуп, бул акыркы алты айдагы эң жогорку көрсөткүч болуп калды. Ал эми акыркы суткада 200 миңге жакын адам вирус жугузган. Кырдаалды 26-ноябрда белгиленип жаткан Алкыш айтуу күнүнө карата иш-чаралар күчөтөрү болжолдонууда. Америкалыктар эң атактуу майрамы болгон бул күнү көпчүлүк адамдар үй-бүлө мүчөлөрү, дос-жары менен чогулуп, бирге тамактанышат.
Өлкөдө 25-ноябрда вирустун кесепетинен 2439 адам каза болуп, пандемия өмүрүн алган адамдардын жалпы саны 262 миңден ашты.
Жон Хопкинс университетинин санагы боюнча, дүйнө жүзүндө коронавирус жугузгандардын саны 60 миллион адамдан ашты.
Европадагы бир катар өлкөлөр ушул айдын башында пандемиянын экинчи толкунунун алдын алыш үчүн чектөөлөрдү киргизген. Германияда киргизилген чектөөлөр кеминде 25-декабрга чейин күчүндө болот. Өлкө канцлери Ангела Меркел 25-ноябрда чектөөлөрдү алуу эрте экенин билдирди.
Бул күнү Германияда коронавирустан улам 410 адам каза болду.