Бишкек шаардык мэриясынын аппарат жетекчиси Балбак Түлөбаев 25-июндагы онлайн брифингде илдеттин жайылуусу күчөп кетсе борбордук штабга калаанын 15-20 күнгө жабуу тууралуу сунуш берилерин билдирди.
"Эгерде бул оору жайыла берсе, анда биз борбордук штабга Бишкекти 15-20 күнгө жабууга сунуш беришибиз мүмкүн. Бул биздин укугубуз. Себеби, ден соолугун бүгүн, өмүрүн ойлошубуз керек", - деди Түлөбаев.
Ошондой эле шаардагы бардык коомдук жайлар санитардык эрежени сактабаса, кечки саат 22:00дон таңкы 05:00го чейин жабылышы мүмкүн экенин кошумчалады. Түлөбаев келаткан жумадан баштап ишемби, жекшемби күндөрү коомдук транспорт жана такси кызматтарынын иштөөсүнө тыюу салынарын белгиледи. Мэриянын аппарат жетекчиси коомчулуктун кайдыгерлигинен эпидемия күчөп баратканын айтты.
Казакстанда соңку бир күндүн ичинде коронавирус дагы 1,5 миңге чукул адамдан аныкталды. Ошентип бул ооруну жуктуруп алгандар саны 32 миң кишиге жетип калды. Бул илдеттен 136 бейтап жан берди.
2017-жылдан бери саламаттык сактоо министри болуп иштеп жаткан Елжан Биртанов кызматтан алынды.
Анын ордуна президент Касым-Жомарт Токаевдин жарлыгы менен Алексей Цой саламаттык сактоо министри болуп дайындалды.
Мындай кадрдык өзгөрүүлөрдүн себеби ачык айтылган жок.
Биртановго мындан он күндөй мурун коронавирус жукканы белгилүү болгон, кийинчерек анын өпкөсү сезгенгени маалымдалган. Ага чейин Казакстанда коронавируска байланыштуу жагдай тууралуу расмий маалыматтарды Биртанов берип келген. Казак коомчулугунда соңку кырдаалга байланыштуу саламаттык сактоо тармагынын жетекчилигине бир катар доомат айтылган.
Коронавирус пандемиясы тууралуу дүйнөлүк статистика. 26-июнь, Бишкек убактысы боюнча таңкы саат 6:00догу маалымат
Дүйнөдө коронавирусту алып жүрүүчүлөрдүн жалпы саны: 9 679 718 (+158 900).
Өлдү: 488 724 (+4 765).
Айыкты: 5 247 040
Активдүү учурлар – 3 943 954. Анын 3 886 511 (99 процент) – орточо оор абалда, 57 443 (1 процент) – оор жана өтө оор абалда жаткандар.
26-июнда өлкө аймагында дагы 250 адамга коронавирус жукканы аныкталды.
Кыргызстанда коронавирус эпидемиясы башталгандан бери кайрадан эң көп учур - 250 жаңы бейтап катталды. Саламаттык сактоо министринин орун басары Мадамин Каратаевдин билдиришинче, алардын эң көбү Бишкек шаарында - 105 адам.
Чүй облусунда 61, Ош шаарында 47, Ош облусунда 19, Жалал-Абад облусунда 12, Ысык-Көл жана Баткен облустарында экиден, Нарын жана Талас облустарында бирден адам.
Акыркы суткада коронавирус илдетинен дарыланып жаткан 50 бейтап айыгып, үйүнө чыгарылды.
Ушуну менен СOVID-19га чалдыккандар 4204 адамга жетти.
- Жалал-Абад облусунда – 269
- Ош облусунда – 429
- Ош шаарында - 500
- Чүй облусунда – 587
- Бишкек шаарында – 1552
- Баткен облусунда – 48
- Нарын облусунда – 464
- Ысык-Көл облусунда – 76
- Талас облусунда - 39 киши.
- (чет өлкөлөрдөн келген кыргызстандыктар - 240)
Алардын 669у медкызматкерлер. 403ү айыкты.
Обсервацияда жаткандардын саны 1569 адам. 2162 адам айыкты. 633 адам ооруканада, 46 адамдын абалы оор, 12 адам реанимацияда жатат. Үй шартындагы изоляцияда 1366 адам бар. 43 адам каза болду.