Кыргызстанда коронавирустан каза болгондордун көрсөткүчү төмөндөп, жакшы тенденция байкала баштады. Бул тууралуу 20-июлда саламаттык сактоо министринин орун басары Мадамин Каратаев онлайн брифингде билдирди:
“Кудайга шүгүр, акыркы күндөрү өлүмдүн көрсөткүчүндөгү тенденция жакшы жакка бурулуп жатат. Өлүмдүн көрсөткүчү – акыркы суткада тастыкталган COVID-19дан эки эле адам (бирөө Бишкекте, бирөө Ош шаарында), ал эми лабораториялык жактан тастыкталбаган COVID-19дан 32 адам көз жумду. Эпидемия башталгандан берки жалпы көрсөткүч 1037 адам болду. Бүгүнкү күндө стационарларда 13 201 адам дарыланып жатат. Алардын арасында реанимациядан которулгандар да бар. Тенденцияны көзөмөлдө кармап жатабыз”.
Жалпысынан коронавирус эпидемиясы башталган март айынан бери Кыргызстанда бул инфекция 27 143 адамга жукту, алардын 13 109у айыгып чыкты, 1 037си каза тапты.
Соңку бир суткада ооруканаларда коронавирустан жалпысынан 34 адам көз жумду.
Буга чейин бул илдеттен каза тапкандар боюнча эң жогорку көрсөткүч 15-июлда катталып, 84 адамды түзгөн.
21-июлга карата соңку сутка ичинде Кыргызстандын ооруканаларында коронавирустан 42 адам каза тапты. Бул тууралуу Саламаттык сактоо министрлигинин өкүлү Айнура Акматова билдирди.
Кайтыш болгондордун тогузу Бишкекте. Ош жана Ысык-Көл облустарында жетиден, Жалал-Абад облусунда беш, Талас жана Нарын облустарында төрттөн, Чүй облусунда үч, Ош шаарында эки жана Баткен облусунда бир адам.
Кечээтен бери бул илдетти жуктуруп алган 1 108 адам жаңы катталды.
Ооруканада дарыланып жаткандардын арасынан 1 667 бейтап айыгып, бир суткада үйүнө чыкты.
Жалпысынан коронавирус эпидемиясы башталган март айынан бери бул инфекция 28 251 адамга жукту, алардын 14 776сы айыгып чыкты, 1 079у каза тапты.
Азыркы тапта ооруканаларда коронавирус болгон 12 563 бейтап дарыланып жатат.
17-июлдан тартып Кыргызстан пневмонияны да коронавирус катары каттай баштады.
Өлкөнүн башкы пульмонологу азыр денеси ысып, тумоологондордун баары коронавирус экенин айтууда.
Кыргызстанда коронавирусту жумушунан жугузган медицина кызматкерлери мамлекеттен кенемте ала элек. Каза болгон дарыгерлердин канчасынын үй-бүлөсүнө материалдык жардам төлөнгөнү тууралуу расмий маалымат жок.
"Азаттыктын" бул маселе боюнча суроосуна жоопту 21-июлдагы онлайн брифингде Саламаттык сактоо министрлигинин өкүлү Айнура Акматова оору жуккан 40 дарыгердин документтери каралып жатканын айтуу менен чектелди:
"Коронавирустан жабыркаган бардык медицина кызматкерлеринин арасынан биринчи 40 адамдын тизмеси облустардан берилген. Илдетти тастыктап, анан төлөп бериш үчүн эпидемиологиялык документ жана атайын акт керек болчу. Ошол эпидемиологиялык корутундулар даярдалбай... Ар бир медициналык кызматкерге өзүнчө даярдалып берилиши керек экен. Облустар баарын таблицага салып даярдап беришкен. Ошондуктан ар бир медкызматкер боюнча өзүнчө даярдоо тапшырмасы берилген".
Оору жуккан медицина кызматкерлерине 200 миң сом, ал эми каза болгондорго 1 миллион сом кенемте төлөө тууралуу чечим өкмөттө май айынын башында кабыл алынган.
41 дарыгерге кенемте төлөнгөнү жатканы бир ай мурда айтылган.
Саламаттык сактоо министрлигинин расмий эсебинде, иштеп жатып вирустан каза болгон дарыгерлердин саны тогузга жетти. Журналисттердин эсептөөсүндө, бул көрсөткүч кыйла жогору.
21-июлга карата коронавирус жугузуп алган медкызматкерлердин жалпы саны 2 428ге жетти, алардын 624ү айыгып чыккан.
АКШнын президенти Дональд Трамп Кошмо Штаттарында COVID-19 кеңири жайыла баштаганын ырастады. Ал соңку абалдан улам 21-июлдан тартып Ак үйдүн коронавируска байланыштуу түзүлгөн жумушчу тобунун күнүмдүк брифинги жанданарын билдирди.
Бул жумушчу топ март-апрель айларында коронавирус пандемиясына байланыштуу күн сайын брифинг уюштуруп турган. Трамп айрым бир учурда "коомчулукту адаштырган же туура эмес маалымат берет" деген мазмундгы сынга кабылгандан кийин бул иш-чараны токтотуп койгон.
АКШда президенттик шайлоого үч ай калды жана соңку сурамжылоолорго ылайык бийликтин пандемия маалындагы иш-аракеттеринен улам Трамптын рейтинги төмөндөп жатат.
Флоридада соңку бир күндө коронавирус дагы 10 миң адамдан аныкталды, бул штатта акыркы бир аптага жакын убактан бери ушундай көрсөткүч сакталып турат. Калифорниянын бийлиги ооруканага түшкөн бейтаптар көбөйгөнүн билдирди.
АКШда коронавирус 3,7 миллионго чукул адамга жугуп, оорудан 140 миңден көп бейтап көз жумду.
Дүйнө жүзүндө илдетке кабылгандар 14,6 миллион адамдан ашты жана көз жумгандар 600 миңден ашты.