Индиянын Саламаттык сактоо министрлиги 26-августта өлкө боюнча 38 миңден ашуун адамдан өпкөнү сезгенткен коронавирус табылганын билдирди. Бул шаршемби күнү дүйнө өлкөлөрүндө катталган эң чоң көрсөткүч.
Акыркы бир сутка ичинде Индияда COVID-19 илдетинен көз жумгандар дагы 1023 кишиге көбөйүп, алардын жалпы саны 60 миңден ашты.
Индия вирусту жугузуп алгандардын саны боюнча дүйнөдө АКШ жана Бразилиядан кийинки үчүнчү орунда турат. Өлкөдө коронавирустун тастыкталган учурлары 3 миллион 310 миңден ашты.
Дүйнөдө былтыр декабрь айында Кытайдан башталган вирусту жугузуп алгандардын расмий саны 24 миллион 182 миңден ашты. COVID-19 илдети баш-аягы 826 миңден адамдын өмүрүн алды.
Кыргызстанда бир сутка ичинде COVID-19 илдети дагы 128 кишиден аныкталды.
Саламаттык сактоо министринин орун басары Нурболот Үсөнбаев 28-августтагы брифингде билдиргендей, Бишкекте - 18, Ош шаарында – 3, Чүй облусунда – 12, Ош облусунда- 14, Талас облусунда - 6, Нарын облусунда – 3, Ысык-Көл облусунда – 24, Жалал-Абад облусунда – 27, Баткен облусунда - 21 кишиден вирус табылды.
Өткөн сутка ичинде COVID-19 илдетинен каза болгондор катталган жок. Коронавирустан каза болгондордун жана аны жугузуп алгандардын жаңы эсеби боюнча Кыргызстанда пандемия башталган март айынан бери илдеттин курмандыктары 1058 кишини түздү.
Саламаттык сактоо министрлиги 18-августта каза болгондордун статистикасы кайра каралып чыкканын, ага ылайык 437 кишинин өлүмүнө башка оорулар себеп болгонун, сегиз учур эки жолу катталып калганын жарыялаган. Ага чейин вирус жалпы 1498 кишинин өмүрүн алганы айтылып жаткан.
Пандемия башталгандан бери коронавирус жугузуп алгандар 43587ге жетти. Анын 37726сы айыкты.
Кыргызстанда өпкөнү сезгентүүчү коронавирус илдети менен пневмониянын эл арасында жайылышы токтой элек. Бул тууралуу саламаттык сактоо министринин орун басары Нурболот Үсөнбаев 28-августтагы брифингде билдирип, катталып жаткан учурлар коронавирус менен пневмониянын жайылышын көрсөтүп жатканын айтты. Ал жарандарга кайрылып, беткап тагынууга, аралыкты сактоого, колду жууп турууга, санитардык эрежелерди сактоого чакырды.
"Азырынча коронавируска каршы күрөштү токтотуп, өзүбүздү бош кое бергенге эрте", - деди Нурболот Үсөнбаев.
Коронавируска каршы күрөшүү боюнча республикалык штабдын маалыматына караганда, Кыргызстанда учурда коронавирус жугузуп алган 5000ден ашуун бейтап дарыланып жатат.
Коронавирустан каза болгондордун жана аны жугузуп алгандардын жаңы эсеби боюнча Кыргызстанда пандемия башталган март айынан бери илдеттин курмандыктары 1058 кишини түздү.
Бишкекте адистер коронавируска кабылгандарды аныктоо максатында үймө-үй кыдырып жатышат. Шаардын вице-мэри Виктория Мозгачева 28-августтагы брифингде билдиргендей, бүгүнкү күнгө карата адистер 86 миңден ашык үйдү кыдырып, 190 миңден ашык жарандын абалын сурады.
Анын жыйынтыгында 6945 кишиден курч кармаган респиратордук-вирустук инфекциялар жана пневмониянын белгилери байкалган. Аларга үйдөн дарыланбай, дарыгерлерге кайрылуу тууралуу сунуштар берилген.
Мозгачеванын айтымында, акыркы күндөрдө баш калаада коронавирус жугузуп алгандар мурункуга салыштырмалуу азайды. Бирок оору жугузгандар жана анын курмандыктарынын статистикасы боюнча Бишкек алдыда.
«1-августка карата маалымат боюнча Бишкекте коронавирус жана пневмония менен 412 учур катталса, 27-августка карата 32 учур каттоого алынды», - деди Виктория Мозгачева.
Кыргызстанда коронавируска жана пневмонияга чалдыккандардын 40,31% Бишкек шаарына туура келет.
Буга чейин Саламаттык сактоо министрлиги жана Коронавируска каршы күрөш боюнча республикалык штаб статистика төмөндөгөнү менен оорунун жайылышы басаңдай элек деп эскерткен. Алар жарандарды санитардык эрежелерди, аралыкты сактоого, беткап кийип жүрүүгө чакырган.