29-августка карата Кыргызстанда коронавирустан жана пневмониядан каза болгондор катталган жок. Бул тууралуу Коронавируска каршы республикалык ыкчам штаб маалымдады.
Ал эми акыркы суткада коронавирус жана пневмониянын лабораториялык тастыкталган 125 жаңы учуру аныкталды. Анын ичинде басымдуу бөлүгү Бишкек шаарында.
- Бишкек - 30
- Ош – 2
- Чүй облусу – 8
- Ош облусу - 12
- Талас облусу - 6
- Нарын облусу – 1
- Ысык-Көл облусу – 13
- Жалал-Абад облусу – 31
- Баткен облусу - 22.
Жалпысынан пандемия башталгандан бери коронавирус илдетине чалдыккандардын саны өлкөдө 43 712 адамга жетти.
Ал эми акыркы сутка ичинде оорудан 247 адам айыкты. Сакайып ооруканадан чыккандардын ичинен бешөө медицина кызматкери. Дагы 11 медицина кызматкери үй карантинден чыгышты.
Жалпысынан республика боюнча COVID-19 диагнозу менен медициналык кызматкерлер арасында – 3126 учур катталды, алардын ичинен 2440 медкызматкер айыкты.
Венгрия өкмөтү 1-сентябрдан тарта чет өлкөлүктөрдү киргизбей турган болду.
Өлкөдө коронавируска чалдыккандар көбөйүп жатканына байланыштуу Венгрия Евробиримдиктеги чек арасын биринчи болуп жапты.
Акыркы жумаларда Евробиримдиктеги көпчүлүк өлкөлөрдө коронавирус илдети кайра күч алганы байкалууда.
Италия, Испания, Британияда ооруга чалдыккандардын саны суткасына миңден ашууда.
Францияда 28-августка караган күнү жети миң адам ооруга чалдыкканы аныкталган. Мындай көрсөткүч Францияда 31-мартта катталган. Парижде көчөдө беткап кийүү талабы кайрадан киргизилди.
Быйыл мартта Европадагы пандемиядан улам Шенген келишимине кирген өлкөлөрдүн көпчүлүгү чек араларын жапкан. Июнь айынын аягына карай чек аралар ачылып, талаптар жумшарган. Айрым өлкөлөр сырттан кирген жарандарды текшерилүүгө же эки жумалык карантинге жиберүүнү улантышууда.
Шенген аймагынын тышкы чек арасы дагы деле көптөгөн өлкөлөрдүн жарандары үчүн жабык. Алардын арасында АКШ жана Орусия да бар.
АКШдагы Жонс Хопкинс университетинин маалыматына караганда, дүйнөдө коронавирус илдетине 25 миллионго чукул адам кабылды. Алардын ичинен 6 миллиондон ашууну америкалыктар. Дүйнө жүзүндө коронавирус илдетинен көз жумгандардын саны 900 миң адамга чукулдады.
Берлинде коронавирус пандемиясына каршы бийликтин саясатына жана чектөөлөргө нааразылардын митинги өтүп жатат.
"Интерфакс" агенттиги маалымдагандай, 29-августта Берлиндин жашоочулары көптөгөн борбордук көчөлөргө чогулду.
Митингге чыккандардын көпчүлүгү беткапсыз. Метролордун кире бериштеринде Берлин транспортунун коопсуздук кызматкерлери элди беткап кийүүгө үндөп турушат.
Адамдар чогулган жерлерде полиция да жүрөт, бирок алар чогулгандарга эч кандай тоскоолдук жараткан жок. Эл чогулуп жаткан аймактын үстүндө полициянын тик учагы да кырдаалга көз салып, айланып учуп жүргөнү кабарланды.
"Bild" маалымат агенттиги полицияга шилтеме берип, дагы бир борбордук көчө - Фридрихштрасседе 18 миңге чукул адам чогулганын билдирди.
Берлиндин көчөлөрүндөгү коопсуздукка ушу тапта 3 миң полициячы көз салууда. Эл чогулган жерлерге суу бүркө турган автоунаалар алып келингени кабарланды. Бирок маалыматка караганда, алар көп жылдан бери чогулган элди таратуу үчүн эмес, жолдорду автоунаалардан тосуу үчүн колдонулуп келет.
Дүйнөлүк саламаттыкты сактоо уюмунун маалыматына караганда, Германия оору жуктургандардын саны жагынан 20-орунда. Пандемия башталгандан бери өлкөдө 243 миңге чукул адамга вирус жуккан. Оорудан көз жумгандардын саны 9360ка жетти. 217 миңден ашууну сакайып чыкты.
Германияда 83,8 миллионго чукул калк жашайт.