Кыргызстанда акыркы бир сутка ичинде COVID-19 илдети лабораториялык жол менне дагы 89 кишиден табылды.
Коронавируска каршы күрөшүү боюнча республикалык штаб 5-сентябрда билдиргендей, вирус жугузуп алгандардын 14ү Бишкекте катталды.
Ош шаарында бир, Чүй облусунда – 9, Ош облусунда - 13, Талас облусунда - 4, Нарын облусунда бир, Ысык-Көл облусунда – 18, Жалал-Абад облусунда – 10, Баткен облусунда - 19 кишиден вирус аныкталды.
Өлкөдө пандемия башталган март айынан бери коронавируска чалдыккандар 44316 кишиге жетти. Анын 39648и айыкты.
Расмий эсеп боюнча ушу тапта коронавирус жугузуп алган 577 бейтап стационарларда, 4097 киши үй шартында дарыланып жатат.
Кыргызстанда коронавируска чалдыккан учур биринчи жолу 18-мартта расмий катталган.
Бишкек шаарында жаңы инфекциялык оорукананын курулушу 65% бүтүп калды. Коронавируска каршы күрөшүү боюнча республикалык штабдын маалыматына караганда, 100 орунга эсептелген объекттин курулушу төрт блоктон турат.
Курулушта 105 жумушчу иштеп жатат. Имараттын курулушуна тез тургузулуучу каражаттар колдонулууда.
Аны курууга Аймактарды өнүктүрүү фондунун эсебинен 60 миллион сом бөлүнгөн.
COVID-19 пандемиясы күчөгөн июнь-июль айларында Кыргызстандын ооруканаларында орун жетишпей, өкмөт, ыктыярчылар менен ишкерлер күндүзгү жана кечки стационарларды ачып, бейтаптарды тейледи.
Саламаттык сактоо тармагындагы бир катар адистер жана жарандык активисттер, коомчулук бийликтин карантинде бир да оорукана кура албаганын, тармактагы өксүктөрдүн чечилбегенин катуу сынга алыган.
Архитектура, курулуш, турак жай жана коммуналдык чарба мамлекеттик агенттиги буга чейин республика боюнча 14 саламаттык сактоо мекемесинин курулушу жана оңдоп-түзөө иштери жүрүп жатканын, анын бешөө жаңыдан салынып, тогузу капиталдык оңдоодон өткөрүлүп жатканын билдирген.
"Evening Standard" гезити Дүйнөлүк саламаттык сактоо уюмунун коронавирустун вакцинасын чыгаруу тууралуу билдирүүсүн жарыялады. Уюмдун басма сөз катчысы Маргарет Харрис буга чейин чыккан Оксфорд университети менен "AstraZeneca" компаниясынын, Орусиянын вакциналарынын таасири 50% гана аныкталганын билдирди.
Харрис өз билдирүүсүндө "Жаңы вакциналар азыр бир топ адамга сыналды, бирок анын таасири, коопсуздугу дале бүдөмүк бойдон. Келерки жылдын ортосуна чейин вакцина жалпыга жеткиликтүү болору күмөн", - деди.
Анын алдында АКШнын саламаттык сактоо тармагындагылар Pfizer компаниясынын вакцинасы октябрда даяр болорун жарыялаган эле.
ДССУ кокус вакцина ийгиликтүү чыкса, анда дүйнөнүн чар тарабына адилет таратылышы керектигин эскертти.
Саламаттык сактоо министрлиги 5-сентябрда Интернеттеги социалдык тармактарда тараган балдардын оорусу тууралуу маалыматтар жалган экенин айтып, ага ишенбөөгө элди чакырууда.
Буга чейин WhatsApp аркылуу Ысык-Көл облусундагы жана Бишкек шаарындагы саламаттык сактоо мекемелеринде оор абалда ооруп жаткан балдар жапырт катталып жатканы, аларды кабыл алууга бош орундардын жоктугу тууралуу маалымат тараган.
Саламаттык сактоо министрлиги бул маалыматты төгүндөдү. Мекеменин билдирүүсүндө, азыр бардык балдар ооруканалары иштеп жатат жана балдар арасында эпидемия жок. Бишкектеги бейтапканаларда орундар бош турат. Ысык-Көл облусунда балдарды кабыл алуу үчүн жалпы 121 орун даярдалган, анын 115и бош.
Буга чейин Саламаттык сактоо министрлиги Кыргызстанда балдар арасында Кавасаки синдрому катталбаганын билдирип, элди дүрбөлөңгө түшпөөгө чакырды.
COVID-19 илдети менен байланышкан оору балдар арасында кездешип жатканын мурдараак Кадрларды кайра даярдоо жана квалификацияны жогорулатуу боюнча мамлекеттик медициналык институттун педиатрия кафедрасынын башчысы Венера Шүкүрова брифингде маалымдаган.