Кыргызстанда коронавирус инфекциясы жуккан дагы бир бейтап - Талас облусунун тургуну каза болду. Бул тууралуу 9-сентябрда Коронавируска каршы республикалык ыкчам штаб кабарлады.
Штабдын ушул эле күнкү маалыматына караганда, илдетке чалдыккан 87 бейтап жаңы катталды. Аладын эң көбү Бишкек шаарында - 27. Баткен облусунда 17, Жалал-Абад облусунда 13, Ош облусунда 11, Чүй облусунда сегиз, Ысык-Көл облусунда жети жана Ош, Талас облустарында экиден адам катталды.
Жалпысынан коронавирус эпидемиясы башталган март айынан бери Кыргызстанда бул илдет 44 613 адамга жукту, алардын 40 336сы айыкты, 1063 бейтап каза болду.
Азыр COVID-19 илдетине чалдыккан 535 бейтап ооруканаларда жатат, 2373 бейтап үйүндө дарыланууда.
Оору жугузгандардын 3159у - медицина кызматкери. Алардын ичинен бир дарыгер Жалал-Абад облусунда жаңы катталды.
Коронавирус коркунучуна байланыштуу Кыргызстандын айрым аймактарында 25-мартта өзгөчө абал режими киргизилген. Бул эреже 11-майдан тартып токтогон, бирок 22-мартта жарыяланган өзгөчө кырдаал режими уланууда.
Европада коронавирустун учурлары көбөйүп жатат. Чехияда шейшембиде вирусту 1 164 киши жугузуп алганы аныкталып, пандемия башталгандан бери рекорд болду. Мурунку күнү мындан эки эсе аз катталган. 10-сентябрдан тартып бардык жабык коомдук жайларда кайрадан маска тагынып жүрүү эрежеси, башка чектөөчү чаралар киргизилүүдө.
Англияда 14-сентябрдан баштап алтыдан көп кишинин чогулушуна тыюу салынмакчы. Мектептерге, иш орундарына, үйлөнүү үлпөттөрүнө жана тажияларга андай тыюу жок. Буга чейинки чектөө 30 киши болчу. Саламаттык сактоо министри Мэтт Хэнноктун айтымында, чектөөлөр Рождествого чейин жумштартылышы мүмкүн.
Акыркы жумада Британияда илдет жуккандар күнүнө эки миңдин айланасында болуп келатат. Дүйнөдө коронавируска 27 миллиондон көп киши чалдыкты, өлгөндөр 900 миңге жакындады.
Ал арада «АстраЗенека» фармацевтикалык компаниясы коронавируска каршы вакцинаны сыноонун акыркы баскычын улантууну убактылуу токтотту. Буга вакцина сайылган ыктыярчылардын бири түшүнүксүз ооруга чалдыкканы түрткү болду. Бул тууралуу компания 8-сентябрда кабарлады. Анда эмдөө «көз каранды эмес комиссияга коопсуздугун текшерүүгө мүмкүнчүлүк бериш үчүн» убактылуу токтотулганы жазылган. Компания муну кадыресе көрүнүш катары мүнөздөп, мындай текшерүүлөр сыноо маалында болуп турарын белгиледи.
«АстраЗенека» жана Британиядагы Оксфорд университети чыгарган бул вакцина - учурда өндүрүшкө чыгары күтүлүп жаткан негизги талапкерлердин бири.
«АстраЗенека» - вакцинаны сыноонун үчүнчү баскычын өткөрүп жаткан үч компаниянын бири. Учурда АКШда түмөндөгөн ыктыярчылар сыноого катышууда. «Pfizer» жана «Moderna» компаниялары чыгарган препарат да сыноонун үчүнчү фазасына жеткен.
Ал арада италиялык изилдөөчү медиктер орусиялык вакцинанын клиникалык сыноосу күмөн жаратарын билдиришти. «Lancet» журналына жарыяланган ачык катта алар түрдүү эксперименттердин жыйынтыктары бирдей болуп чыкканын белгилешкен.
Вакцинаны чыгарган Гамалея борбору статистикалык маалыматтар бурмаланган деген дооматты четке какты.
Кыргызстанда соңку бир суткада COVID-19 илдетинен каза болгондор катталган жок. Бул тууралуу 10-сентябрда коронавируска каршы күрөшүү боюнча республикалык штаб кабарлады.
Штабдын ушул эле күнкү маалыматына караганда, илдетке чалдыккан 71 бейтап жаңы катталды. Саламаттык сактоо министрлигинин өкүлү Айнура Акматованын айтымында, алардын эң көбү Баткен облусунда – 19 адам:
«Бишкек шаарында 15, Ош шаарында бир, Чүй облусунда төрт, Ош облусунда беш, Талас облусунда төрт, Ысык-Көл облусунда сегиз, Жалал-Абад облусунда 15 адам катталды».
Жалпысынан коронавирус эпидемиясы башталган март айынан бери Кыргызстанда бул илдет 44 684 адамга жукту, алардын ичинен 40 487 бейтап айыкты, 1063 бейтап каза болду.
Азыр COVID-19 илдетине чалдыккан 532 бейтап ооруканада жатат, 2260 адам үйүндө дарыланууда.
Оору жугузгандардын 3 160ы - медицина кызматкерлери. Алардын арасынан 2635 медкызматкер айыкты.
Коронавирус коркунучуна байланыштуу Кыргызстандын айрым аймактарында 25-мартта өзгөчө абал режими киргизилген. Бул эреже 11-майдан тарта токтогон, бирок 22-мартта жарыяланган өзгөчө кырдаал режими сакталууда.
Өкмөт коронавирус жугузуп алган медицина кызматкерлерине жана бул оорудан каза болгон дарыгерлердин жакындарына кенемте төлөп берүү тууралуу маалымат берди. 11-сентябрда Саламаттык сактоо министрлигинин өкүлү Айнура Акматова билдиргендей, жалпысынан 165 адам боюнча каражат бөлүндү.
«Өкмөттүн 2020-жылдын 4-майындагы буйругунун негизинде бүгүнкү күндө 144 медицина кызматкерине 200 миң сомдон бир жолку акчалай компенсация төлөнүп берилди. Ал эми каза болгон 21 медкызматкердин үй-бүлөсүнө бир миллион сомдон төлөндү», - деди ал.
Коронавирус эпидемиясы башталган март айынан бери Кыргызстанда бул илдет 3 163 медкызматкерге жукту, алардын 2 657си айыкты, каза болгондор 70тен ашты. «Азаттыктын» маалыматына караганда, кайтыш болгондор 80ден көп.
«Кызыл зонада» иштегендерге өкмөт айлыгына кошумча төлөп берүүгө да убада берген. 8-сентябрда премьер-министр Кубатбек Боронов бул максатта жыл аягына чейин бир миллиард 425 миллион сом каралып жатканын билдирген.
Саламаттык сактоо министрлигинин финансы бөлүмүнүн жетекчиси Мухтарбек Баймырзаев «Азаттыкка» 9-сентябрда билдиргенине караганда, эпидемиянын алдын алуу жана ооруга каршы күрөшүү максатында ишке тартылган адистердин кошумча эмгек акысы үчүн март-июль айларында бюджеттен 785,4 миллион сом каражат бөлүнүп, анын баары иштегендерге төлөнгөн.