“Азаттыктын” Бишкектеги кабарчысы. 2011-жылы Мамлекеттик Ардак грамота менен сыйланган. Кыргыз улуттук университетинин филология факультетин аяктаган.
Жарандарды паспорт менен камсыз кылуу жаңы жылдан тарта аз-аздан жолго түшө баштады. Маалыматтык технологиялар жана улуттук ресурстар агенттигинин маалыматы боюнча, 13-декабрдан 1-январга чейин паспортко муктаж 2 500 ге жакын адам паспортко ээ болушту. Жаңы жылдан тарта бардык аймактарда паспорт алуу мүмкүнчүлүгү көбөймөкчү.
29-декабрь күнү Жогорку Кеңештин алдында 100 дөн ашуун өрт өчүргүчтөр нааразылык акциясына чыгышты. Алар жыл башынан бери алалбай келишкен тамак-аш үчүн бөлүнүүчү акчаларын төлөп берүүнү жана өрт өчүрүүчүлөрдүн иштөө шартын жакшыртып берүүнү талап кылышууда. Түштөн кийин өрт өчүргүчтөр менен өкмөт башчы Феликс Кулов жана каржы министри Акылбек Жапаров жолугушту.
17-июндагы өкмөт үйүн басып алууга жасалган аракеттер үчүн экс-спикер Мукар Чолпонбаевдин үстүнөн башталган сот иши 26-декабрда 1-Май райондук сотунда улантылды. Бул күнкү отурумунда сот «Мекеним Кыргызстан» саясий кыймылынын мүчөсү, күбө катары чакырылган Кенжалы Сарымсаковдун көрсөтмөсүн укту.
Жаңы жылдан тарта паспорт көйгөйүн тартып келген жарандардын баарынын маселеси чечилет. Ички иштер министринин маалыматы боюнча, паспортко муктаж атуулдарды толук камсыздоого жетишээрлик өлчөмдө Молдованын «Регистру» компаниясы тарабынан чыгарылган паспорттор бар. Бирок кыргыз өкмөтү менен Түштүк Кореянын Venture C&G Plaza компаниясынын чыры аягына чыга элек. Айрым пикирлер боюнча, бул чырга мурунку жана азыркы бийликтин тиешеси бар.
Майрам Акаеванын мурда Президент К. Бакиевге жазган ачык катына мамлекеттик катчы, «Теңир Ордо» улуттук дөөлөт мурастарды сактоо, өнүктүрүү фондусунун президенти Дастан Сарыгулов жооп кайтарды. Бул тууралуу мамлекеттик катчы 21-декабрда болуп өткөн маалымат жыйынында билдирип, экс-президентти жана анын жубайын актанганды токтотуп, кылган кылыктары үчүн Кудайдан коркуп, кыргыз элинин алдында кечирим суроого чакырды. Анын айтымында, Акаевдердин жеке басар үй-бүлөлүк башкаруу жылдарында кыргыз эли миң жылдык тарыхта болбогон баңгиликке, сойкулукка, эки жүздүүлүккө жана коррупцияга чырмалган.
Кыргызстандагы дунган диаспорасынын өкүлдөрү ата-бабасынын сөөгү жаткан мүрзөнү сүрүп, анын ордуна мечит куруу жөнүндө Бишкек бийлигинин чечимине каршы чыгышты. Үстүбүздөгү жылдын август айында Бишкек мэриясы шаардагы эски мүрзөнү мечит жана медресе куруу үчүн «Ихсан-Хария» жана «Фанчин» фонддоруна берүү тууралуу чечим чыгарып берген.
Мурунку биринчи вице-премьер-министр милдетин аткаруучу Данияр Үсөнов эл аралык «Либерман» аттуу юридикалык компаниясына берген 500 миң долларын өндүрүп берүүнү өтүнүп башкы прокуратурага кайрылгандыгы тууралуу өткөн жумада айрым маалымат каражаттары жазып чыгышкан. Бирок, бул маалыматты башкы прокуратура төгүнгө чыгарууда. Саясатчылар болсо, «Либерман» компаниясы менен кыргыз өкмөтүнүн түзгөн келишими чала түзүлүп калгандыгын айтып жатышат.
Вице-премьер-министр Адахан Мадумаров 13-декабрда «Пирамида» телерадиокомпаниясын талашып жаткан тараптар менен жолугушту. Анда вице премьер-министр бул чатакка президенттин эч кандай тиешеси жок экендигин билдирди. Жолугушууда «Пирамиданын» айланасындагы чырды башынан тарта, өткөн жылы компаниянын 50% акциясы «Ареопаг-Бишкек» компаниясынын колуна өткөндөн тартып иликтөө зарылчылыгы да белгиленди.
Президент Курманбек Бакиев мамлекеттин карамагында болуп келген «Кыргыз туусу», «Слово Кыргызстана» гезиттерин жана облустук басылмаларды акционерлештирүү боюнча жарлыкка Өткөн жумада кол койду. Анда айтылгандай, бул кадам мамлекеттик маалымат каражаттарынын коомчулуктагы ролун жогорулатуу максатында жасалган жана гезиттердин окуяларды калыс чагылдыруусуна шарт түзмөкчү. Бирок, басылмаларды акционерлештирүү кандай негизде ишке ашаары белгисиз бойдон калууда.
11-декабрда саясий партиялардын өкүлдөрү жана ишкерлер Конституциялык реформа боюнча тегерек үстөл талкуусун өткөрүштү. Анда мамлекеттик башкаруу системасын өзгөртүүнү, парламенттик шайлоону партиялык тизме менен жүргүзүүнү Баш мыйзамдын долбооруна киргизүү тууралуу сөз болуп, мыйзам долбоорун талкуулоону 24-январга чейин жылдыруу тууралуу сунуш кабыл алынды.
«Пирамида» телерадиокомпаниясынын төбөсүнө үйүлгөн кара булут дагы деле таркай элек. Белгисиз адамдар 9-декабрь күнү күндүзгү саат үчтөн өтүп калган мезгилде жана түнкү саат 12ге жакын телекомпанияга күч менен кирүүгө аракет кылышкан. Компания жетекчилиги «Пирамидага» жаңы бийликтин өкүлдөрү ээлик кылууну каалап жатышат деп билдиришүүдө.
Кыргызстанда 2006-жылы саламаттык сактоо, билим берүү жана социалдык тармактын кызматкерлеринин эмгек акылары жогорулайт. Ошондой эле жаңы жылдан тарта жаңы салык кодексинин долбоору Жогорку Кеңешке сунушталмакчы. Бул жөнүндө 8-декабрь күнү Экономика жана каржы министри Акылбек Жапаров билдирди.
7-декабрь күнү Бишкекте «Кыргызстандын экономикасын көтөрөлү» деп аталган жыйын болуп өттү. Жыйын эл аралык ишкерлер кеңеши тарабынан уюштурулуп, ага эл аралык банктардын, компаниялардын жетекчилери, ишкерлер, бир нече өлкөлөрдүн элчилери жана премьер-министр Ф.Кулов катышты. Анда негизинен Кыргызстандын экономикасын көтөрүү үчүн жасалып жаткан иштер, чет мамлекеттик кызмат, маалымат алуунун эркиндиги, коррупцияга каршы күрөш тууралуу сөз болду.
5-декабрь күнкү отурумда Жогорку кеңеш эсеп палатасынын аудиторлорун шайлоону баштады. Эсеп палатасындагы 7 орунга жалпы 68 талапкерден арыз түшкөн. Гендерлик саясат тууралуу мыйзам боюнча, шайлануучу аудиторлордун 30% бөлөк жыныстан болууга тийиш. Жума күнкү отурумда депутаттар 7 орундун үчөөнү аялдарга берүүнү макулдашышкан.
4-декабрь күнү Казакстанда өтүп жаткан президенттик шайлоого Кыргызстандагы казак жарандар да салымын кошуп жатышат. Казакстандын элчилигинен алынган маалымат боюнча, күндүзгү саат үчкө чейин Кыргызстанда консулдук каттоодо турган 155 казак жаранынын 80% шайлоого келип, өз добуштарын берип кетишти.
2-декабрь күнү Кыргызстандын Жогорку Кеңеши Тынычбек Акматбаевдин өлүмүнө байланыштуу депутаттык комиссиянын ишине байланыштуу атайын токтом кабыл алды. Ошондой эле бул күнү 1-вице премьер-министрлик орунга Медетбек Керимкуловдун талапкерлигин бекитти. Добуш берүү жашыруун түрдө болду.
Мындан 45 жыл мурда 25-ноябрь күнү Доминикан Республикасынын саясий активисттери, бир тууган эже-сиңдилер Патрия, Минерва жана Мария тереза Мирабальдар жырткычтык менен өлтүрүлүшкөн. 1981-жылы Перулук феминистка Энкуентро бул күндү гендердик теңсиздикке каршы күн катары белгилөөнү сунуш кылган. Ал эми 1999-жылы БУУнун башкы ассамблеясы тарабынан 25-ноябрь аялдарга карата зомбулукка каршы эл аралык күн, деп жарыяланган. Кыргызстанда да дээрлик он жылдан бери бул күн - гендердик теңсиздикке каршы күн катары белгиленип келүүдө.
Үстбүздөгү жылдын март айынан бери өкмөт аппаратына Жогорку Кеңештин депутаттарынан 400 гө жакын суроо-талап келип түшкөн. Мындан тышкары министрликтерге жана аткаруу бийликтерине да эл өкүлдөрү тарабынан көп сандаган кайрылуулар болот. Бирок көпчүлүк учурда мындай кайрылуулар жоопсуз калат. Бул маселе 23-ноябрдагы өкмөттүк жыйында көтөрүлдү.
Баш прокурор Камбаралы Конгантиев 21-ноябрда өткөн Коопсуздук кеңешинде нааразылык акцияларын жана сөз эркиндигин чектөө боюнча сунуш киргизген. Анын буга чейин пикет, митинг жана жөө жүрүш сыяктуу нааразылык акцияларын уюштурууга бир жылдык мораторий жарыялоо тууралуу сунуш киргизгендиги белгилүү. Баш прокурордун мындай кадамдары саясатчылардын жана жарандык коом өкүлдөрүнүн арасында терс пикирлерди жаратты.
21-ноябрь күнү бир жумалык тыныгуудан кийин Жогорку Кеңеш кайрадан кезектеги отурумун баштады. Отурумда Жарандык кодекстин айрым бир беренелерине, Жер жана айыл чарба кодекстерине өзгөртүү киргизүү тууралуу маселелер каралып, депутаттар тарабынан 6 мыйзам долбоору кабыл алынды.
Дагы жүктөңүз
