“Азаттыктын” Бишкектеги кабарчысы. 2011-жылы Мамлекеттик Ардак грамота менен сыйланган. Кыргыз улуттук университетинин филология факультетин аяктаган.
Президент 2006-жылдын 1-кварталында Кызылкыядагы цемент заводунун курулушун баштоо милдетин койду. Түштүккө цемент заводун куруу зарылчылыгы акыркы жылдарда цемент, шифер сыяктуу курулуш материалдарынын кескин кымбаттап кеткендигинен улам келип чыккан. Кызылкыяда цемент өндүрүүгө керектелүүчү чийки зат запасы бар экени Совет мезгилинде эле аныкталган.
16-ноябрь күнү «Белый параход» басылмасынын журналисттер жамааты маалымат жыйынын өткөрүп, орус тилин сактап калуу боюнча коомчулукка кайрылуу жасады. Анда айтылгандай, акыркы убактарда айрым бир саясий партиялар тарабынан орус тилинен расмий тил макамын алып салуу тууралуу көтөрүлүп жаткан маселе туура эмес. Орус тилин мындай жол менен кысымга алуу - аягында Кыргызстандын өзүн саясий-экономикалык кыйынчылкка алып келүүсү мүмкүн дешет кайрылуу ээлери. Ошол эле учурда орус тилинен расмий тил макамын алып салуу орус тилдүү элдердин укугун тебелөөгө жатпайт, тескерисинче жок болуп кетүү коркунучунда турган кыргыз тилинин тагдыры үчүн жакшы болот деген пикирлер да жок эмес.
Кыргыз өкмөтүнүн басма сөз кызматы тараткан маалыматка караганда, быйыл кышка даярдык начар. Үстүбүздөгү жылы көмүр казып алуунун көрсөткүчү төмөндөп кеткен. Буга Каракече көмүр кениндеги чыр-чатактар, Ташкөмүр, Кызылкыя шаарларында көмүр казып алуунун азайганы себеп деген жоромолдор бар. Ушундан улам, кышында көмүрдүн баасы кыбматтоосу күтүлүүдө.
Кыргызстандын тышкы иштер министри Аликбек Жекшенкулов бүгүн эки күндүк иш сапары менен Орусияга жөнөп кетти. Иш сапардын башкы максаты - орус жана кыргыз мамилесин ар тараптан чыңдоо. Иш сапар мындан сырткары буга чейин Кыргызстандын президенти жана өкмөт башчысы аркылуу орус бийлиги менен түзүлгөн бир катар келишимдердин кандайча ишке ашып жаткандыгын талкуулоого жана Орусиядагы кыргыз мигранттарынын абалы менен жакындан таанышып, алардын көйгөйлөрүн жеңилдетүүгө да багытталган.
«Манас» абамайданынан орун алган антитеррордук күчтөрдүн Ганси авиабазасы боюнча АКШ бийлиги менен кыргыз өкмөтүнүн ортосунда жүргүзүлгөн сүйлөшүүлөрдүн 1-этабы аягына чыкты. Ага ылайык, “Манас” аба майданында жайгашкан Ганси атындагы коалициялык күчтөрдүн базасынын инфраструктурасын пайдалануу боюнча техникалык жана финансылык келишимдерди кайра кароо тууралуу биргелешкен билдирүү жасоого макулдашылды. Ошондой эле кыргыз өкмөтү тарабынан көтөрүлгөн кошумча компенсация тууралуу маселени кароо зарылдыгы белгиленди.
Он күндөн ашуун убакыттан бери Францияда болуп жаткан тополоң кыргызстандыктардын да тынчсыздануусун туудурууда. Азырынча, тополоңдон кыргыз жарандары жабыркаганы тууралуу маалымат жок. Ал эми кыргызстандык айрым саясатчылар Батыш Европада болуп жаткан бул тополоңду социалдык жарылуу катары баалап жатышат.
Аксы окуясынын күнөөкөрлөрү эмдигиче аныктала элек. 2002-жылдын 17-18-мартында окко учкандардын жакындары жана октон жаракат алып, майып болгондор мурунку башкы прокурор Азимбек Бекназаровдун кызматтан алынуусу менен бул иш аягына чыкпай калуусу мүмкүн деген кооптонууларын билдиришүүдө.
Акыркы убактарда массалык маалымат каражаттарында Башкы прокуратуранын иши басаңдап калды, деген дооматтар айтыла баштаган. Мурунку баш прокурор Азимбек Бекназаров өзү баштаган бир топ иштер аягына чыкпай токтоп тургандыгы тууралуу жакында эле «Лица» гезитине берген маегинде да белгилеген. Бирок баш прокурордун 1-орун басары Жумадил Макешов «Азаттыкка» берген маегинде мунун баарын четке кагып, мурда-кийин козголгон кылмыш иштеринин баары тергелип, изилденип жаткандыгын, айрымдары жакын арада сотко ашырылаарын билдирди.
АКШ мамлекеттик катчысы Кондолиза Райстын Кыргызстанга жасаган иш сапарыны максаты тууралуу саясатчылар жана атуулдук коомдун өкүлдөрү ар кандай пикирлерди айтышууда. Алардын айрымдары Кондолиза Райстын иш сапарынын артында АКШнын Кыргызстанга болгон геосаясий кызыкчылыгы жатат дешсе, кээ бирөөлөрү бул иш сапар март ыңкылабынан кийин Кыргызстанда болуп жаткан саясий-экономикалык өзгөрүү жана өсүштөрдү колдоо максатында болду, деген пикирлерин айтышууда.
Кыргызстандагы өзбек качкындарынын абалы дагы деле чечилбеген бойдон калууда. Учурда Ош шаарындагы убактылуу кармоо жайында жаткан 4 бозгунга «качкын» макамын берүү тууралуу сот иши жакында дагы уланмакчы. Ал эми укук коргоо уюмдары Кыргызстанда жашырынып жүрүшкөн жүздөгөн качкындардын тагдырына тынчсызданууларын билдирип жатышат.
АКШ Конгрессине Өзбекстандын президенти Ислам Каримовду Эл аралык сот жообуна тартуу тууралуу резолюциянын долбоору киргизилди. Анда үстүбүздөгү жылдын май айында Анжиян коогалаңындагы кыргын үчүн БУУ тарабынан өзбек президентинин жоопко тартылуусуна АКШ болгон аракетин жумшоосу керек деп айтылган. Ислам Каримовду жоопко тартуу тууралуу Конгресстин бул сунушу кыргыз коомчулугунун бүйүрүн кызытып, ар кыл пикирлерди пайда кылды.
29-сентябрда Оштогу өзбек улуттук борбору өлкө президентинин, өкмөт башчысынын жана ЖК төрагасынын атына кайрылуу жолдоп, анда парламент тарабынан ички иштер министринин биринчи орун басары Шеркозу Мирзакаримовду кызматтан алуу тууралуу кабыл алынган чечимди кайра кароону өтүнүшкөн. Кайрылуу ээлери Шеркозу Мирзакаримов кызматтан алынса, бул анын улутуна байланыштуу болду деп эсептешээрин билдиришкен. Мындай кайрылуу коомчулукта өйдө-төмөн пикирлерди жаратууда.
Акыркы убакта кыргыз коомчулугунда жаңы бийлик укук коргоочуларды жана айрым бийликке каяша айткан адамдарды куугунтуктай баштады деген пикирлер айтыла баштады. Буга укук коргоочу Азиза Абдурасулованын жубайынын белгисиз бирөөлөр тарабынан сабалышы жана 27-сентябрь күнү интернет айдыңы аркылуу тараган «Gazeta.kg» электрондук гезитинин башкы редактору Улан Мелисбектин кайрылуусу негиз болууда.
Акыркы жумада Кыргызстанда мунайзаттын баасы мындан бир ай мурункуга караганда 1-1,5 сомго кымбаттады. Мунай баасынын көтөрүлүүсүн коомчулук жыл сайын күз мезгилиндеги жыйын-теримге байланыштырышууда. Ал эми нефтетрейдерлер дүйнөлүк базарда мунай кымбаттагандыгынан улам, анын илеби Кыргызстанга да келип жеткендигин айтып жатышат.
Азимбек Бекназаровдун башкы прокурордук кызматтан президент тарабынан алынуусуна нааразы болгон 50 дөн ашуун адам 20-сентябрь күнү Өкмөт үйүнүн алдына митингге чыгышты. Алар президенттин бул кадамы туура эмес экендигин белгилешип, Бекназаровду кайрадан кызматына койулушун талап кылышты. Митинг учурунда «Бекназаровду коргоо» комитети кайрадан уюшулуп, Бакиевге кайрылуу жолдонду.
Жекшембиде Бишкектеги №1-Университет шайлоо чөлкөмүндө кайрадан Жогорку Кеңештин депутатын шайлоо болду. Парламенттин депутаттыгы үчүн аталган шайлоо аймагынан 6 талапкер ат салышты. Байкоочулардын баамында, бул шайлоо жараяны мурдагыларга салыштырмалуу бир топ эле солгун жүрдү
Ушул тапта Шайлоо кодексине өзгөртүү киргизүү тууралуу кызуу талаш-тартыштар жүрүп жатат. БШК бул багытта БУУнун Өнүктүрүү программасы менен ЕККУнун Бишкектеги өкүлчүлүгүнүн колдоосунда жер-жерлерде жыйындарды өткөрүп, аны республикалык конференция жыйынтыктады. Мындай жыйындардагы талкууларда Шайлоо кодексине дагы өзгөртүү киргизүү зарылдыгы белгилүү болду.
Кыргыз бийлиги тарабынан буга чейин 439 Өзбекстан жараны качкын макамы менен Румынияга чыгарылган. 15-сентябрь күнү Башкы прокуратуранын чечими менен Ош шаарындагы убактылуу кармоо жайында отурган дагы 11 Өзбекстандык жаран БУУнун Качкындар комиссариатына өткөрүлүп берилди. Учурда төрт Өзбекстандык качкындын тагдыры чечилүүдө. Мындан сырктары дагы 12 өзбек жараны качкын макамын берүү өтүнүчү менен миграция департаментине кайрылган.
Жыл башында болгон парламенттик шайлоонун жыйынтыктарына нааразы болушкан айрым шайлоо округдарынын өкүлдөрү үч айга чейин Жогорку соттун алдында жана ичинде нааразылык акциясын өткөрүп турушкан. Жогорку сот төрагасынын кызматтан кетүүсүн жана шайлоо жыйынтыктарын чыгарууда адилеттүүлүктү талап кылышкан пикетчилерге бийлик тарабынан талаптары аткарыла тургандыгы тууралуу убада берилгенден кийин, июнь айынын орто ченинде нааразылык акциясын токтотушкан. Дээрлик үч айга жакын убакыттан бери талаптары аткарылбаганына нааразы болушкан пикетчилер кайрадан нааразылык акциясын баштаарын 7-сентябрь күнү болгон маалымат жыйынында билдиришти.
Бишкектеги Горький аянтында темир жол бакшармалыгынын он чакты жумушчусу дээрлик үч жарым айдан бери нааразылык акциясында отурушат. Алардын бири Гүлнара Керимбаева эгерде бийлик сөзүн угуп, талабын аткарбаса, Кыргызстандын президенти ант бере турган күнү өзүн-өзү өрттөй тургандыгын айтууда.
Дагы жүктөңүз
