“Азаттыктын” Бишкектеги кабарчысы. 2011-жылы Мамлекеттик Ардак грамота менен сыйланган. Кыргыз улуттук университетинин филология факультетин аяктаган.
Жаңы окуу жылына саналуу күндөр калды. Бирок билим берүү системасындагы кенемтенин орду дагы деле толбой, жалпы билим берүүчү мектептерде айрым сабактар боюнча мугалимдердин жана, окуу китептеринин жетишсиздиги негизги маселе бойдон калууда.
6-август күнү Хантеңирде кырсыкка учураган МИ-8МТВ тибиндеги тик учак кырсыкка учурап, биротоло күйүп кеткен. Андагы 17 адамдын ичинен оор жаракат алган үч киши учурда Бишкектеги тез жардам берүүчү ооруканада жатат. Ал эми өзгөчө кырдаалдар министрлигинин карамагындагы кырсыкка учураган тик учактын кыйроо себептери атайын комиссия тарабынан изилденип жатат.
19-апрель күнү ЕврАзЭстин башкы катчысы Григорий Рапота Кыргызстанга иш сапары менен келди. Ал түшкө чейин Жогорку Кеңештин депутаттары менен жолугушту. Түштөн кийин Кыргызстандын премьер-министри жана президенттин милдетин аткаруучу Курманбек Бакиев, вице-премьер-министрдин милдетин аткаруучу Адахан Мадумаров менен жолугушту. Анын жүрүшүндө Кыргызстандын экономикасын көтөрүү үчүн апкелинүүчү инвестициялар, ЕврАзЭстин үстүбүздөгү жылдын июнь айында болуучу мамлекеттер аралык кеңеши тууралуу сөз болду.
11-апрель күнү Бишкек шаарындагы маршруттук унаалардын айдоочулары иш ташташты. Буга күйүүчү майдын баасынын көтөрүлүп кетиши себеп болгон. Айдоочулар күйүүчү майдын баасын арзандатууну же жолкирени кымбаттаттууну талап кылышты. Ушул эле күнү маалымат жыйынын өткөргөн Кыргызстандагы Нефтрейдерлер ассоциациясынын вице-президенти күйүүчү майдын баасын арзандатууга мүмкүнчүлүк жок экендигин билдирди. Түштөн кийин Бишкек шаардык кеңеши айдоочулардын талабын сессияда карап, бир нече күнгө чейин бааны көтөрбөө жана бул убакта абалды изилдөө тууралуу чечим кабыл алышты.
24-мартта болгон бийлик алмашуудан кийин айрым жерлерде кош бийлик өкүм сүрө баштады. Райондук жетекчилерден тартып, айыл өкмөттөрүнө чейин мурунку жана кийинки шайланган жетекчилер бири-бирин легитимсиз деп санап, жергиликтүү жашоочулардын арасында талаш-тартыш чыгууда.
31-март күнү Кыргызстандын башкы прокурорунун милдетин аткаруучу Азимбек Бекназаров маалымат жыйынын өткөрдү. Анын айтымында кызматынан четтетилген президент Акаевдин жана анын үй-бүлөсүнүн бардык байлыктарын текшерүү иштери жүргүзүлүп жатат жана Кыргызстандын банктарындагы күмөндүү деп саналган эсептердин баары жабылды.
№1 Университет шайлоо аймагынан депутаттыкка талапкер Болотбек Мариповдун ишенимдүү өкүлү Айбек Чокушев 7-март күнү маалымат жыйынын өткөрдү. Анда аталган шайлоо чөлкөмүнөн экинчи айлампага чыккан Болотбек Мариповго үгүт иштерин жүргүзүүгө ар кандай жолдор менен бут тосуулар болуп жаткандыгы тууралуу айтылды. Айбек Чокушевдин сөзү боюнча, №1 шайлоо аймагында үгүт иштерин жүргүзүү мезгилинде белгисиз адамдар күч колдонуп, Болотбек Мариповдун өкүлдөрүнүн үгүт материалдарын тартып алышкан.
Коомдук ишмер, мурунку элчи Медеткан Шеримкулов шайлоо алдында түштүк дубандарды кыдырып келди. Парламенттик шайлоо алдындагы элдин маанайы, жер-жерлердеги нааразылык чаралары, өлкөдөгү саясий кырдаал тууралуу маек куруп берди.
Ооганстандын аймагынан Советтер союзунун аскерлеринин алынып чыгып кеткендигине 15-февраль күнү 16 жыл болот. Буга байланыштуу Ооган согушунун ардагерлери конгрессинин жетекчиси, Улуттук Гвардиянын колбашчысы Абдыгул Чотбаев маалымат жыйынын өткөрдү. Бүгүнкү күндө Ооган согушунун ардагерлерине мамлекет тарабынан кандай камкордук көрүлүп жатат?
АКШдагы «Intercontinental commerce corp» компаниясынын президенти Экрам Миллер Кыргызстанга экономикалык жактан жардам берүүнү көздөп жаткандыгын билдирди. Америкалык компания Кыргызстандын түндүгү менен түштүгүн байланыштыруучу Өзбекстан-Кыргызстан-кытай темир жолдорун курууну, текстиль, туризм жана кайра иштетүү тармагын өнүктүрүүнү каржыламакчы.
Кыргызстанда Вич-инфекциясын алып жүргөндөрдүн саны 669 болсо, алардын жарымы жаза өтөөчү жайларында жаткандар. Глобалдык фонд тарабынан СПИД, кургак учук жана безгек ооруларынын алдын алуу максатында берилген гранттын алкагында башталган антиретровирустук дарылоо жаза өтөөчү жайларда да жүргүзүлө баштады.
Аксы окуясында милиция кызматкерлеринин огунан набыт кеткен беш адамдын жакындары Кыргызстандагы бардык сот инстанцияларына кайрылып, адилеттикке жете алышкан эмес. Жабырлануучулардын жактоочусу Сартпай Жайчыбеков алардын атынан БУУ нун адам укуктарын коргоо комитетине арыз жолдогон. Жакында аталган комитеттин жетекчиси Мариа Франсиссе Ир Чарри айымдан арыз карала баштагандыгы тууралуу жооп келди.
«Эл аралык толеранттуулук үчүн» коомдук уюму тарабынан «Пикет, митинг жана демонстрация учурундагы зомбулуктун алдын алуу» деп аталган семинар болуп өттү. Ага укук коргоочулар, атуулдук коомдун өкүлдөрү жана тартип коргоо кызматкерлери катышты. Бирок бул жыйындагы катуу талаштан кийин да атуулдук коом менен тартип коргоочулар бир пикирге келе алган жок.
Кыргызстан калкынын 5-курултайынын катышуучулары менен жума күнү өкмөт башчысы Николай Танаев жолугушуу өткөргөн. Анда премьер-министр өлкө экономикасынын өнүгүп бараткандыгын жана 2003-жылдан берки болуп жаткан өсүүлөр тууралуу катышуучуларга маалымат берди.
АКШ президенти Жорж Буш 3-февраль күнү конгресстин алдында сүйлөп, «Мамлекеттин абалы тууралуу» кайрылуу жасады. Анда Жорж Буш АКШ мамлекетинин жүргүзүп жаткан саясаты, келечектеги иштери айтып келип, Америка дүйнөгө адилеттик орнотууга жардам бере тургандыгын билдирди. Президент Буш терроризмге колдоо көрсөтүп жаткандыгы үчүн Сирия менен Иранды күнөөлөдү.
Ушул жылдын 7-январында башталган нааразылык акциясы 27-январь күнү да улантылды. Бул күнү пикетчилердин мурунку талаптарына дагы башка талаптар кошулду. Алар ЖКтин мыйзам чыгаруу жыйынынын төрагасы Абдыганы Эркебаевден 20-январь күнү депутаттар тарабынан колдоо тапкан шайлоо кодексине өзгөртүү киргизүү тууралуу мыйзамды президентке жөнөтүүсүн, ал эми президенттин маалымат катчысы Абдил Сегизбаевдин пикетчилерге жапкан жалаа сөзү үчүн жооп берүүсүн талап кылышты.
Эл аралык көз карандысыз басма үйүнүн кызматынан алгач анын ачылышын чыдамсыздык менен күткөн бирин-экин оппозициялык, эркин басылмалар пайдалана башташкан. Кийинчерээк аларга түстүү болуп чыгууну көздөгөн башка басылмалар да, алсак Орусиянын айрым гезиттери, эл аралык жана кээ бир министрликтердин басылмалары да кошулган.
18-январь күнү АКШ сенаты мурунку мамлекеттик катчы Колин Пауэллдин ордуна АКШ президентинин улуттук коопсуздук боюнча кеңешчиси Кондолиза Райсты бекитүү тууралуу маселени карайт. Кондолиза Райс бул мамлекеттик жогорку кызматка президент Буш тарабынан өткөн жылдын ноябрь айында сунушталган. АКШдагы чоң саясий окуя кыргызстандык саясатчылардын да кызыгуусун туудурууда. Айрым саясатчылар түбү теги африкадан чыккан кара айымдын мамлекеттик катчылыкка дайындалышы Борбор Азия өлкөлөрүнө жакшы болот деп айтышса, кээ бир айтылган пикирлер орун алмаштыруудан натыйжа өзгөрбөйт же тескерисинче болуп кетиши ыктымаал дешет.
9-январда «Атажурт» кыймылындагы жаңжал» деген аталыштагы жана «Аксылыктар «курортчу»-премьерге каршы» деп аталган макалалар «Independent news» деген даректен аты-жөнү белгисиз автордун атынан жана «Центр Азия. ру» интернет баракчасына шилтеме катары жазылып алынып таркатылган. Ошол эле күнү «Центр Азия. Ру» интернет баракчасы мындай макала аталган баракчада жарык көрбөгөндүгүн жана бул кимдир-бирөөлөрдүн атайын жасаган чагымы экендиги тууралуу кабарлады. Ал эми саясатчылар жана оппозиционерлер бул макалаларды атайын уюштурулган кара пиар деп баалашууда.
Бишкектеги №1 Университет шайлоо чөлкөмүнөн бейшембиде депутаттыкка талапкерликке катталып, кайра ошол эле күнү беш сааттан кийин талапкерлиги алынып салынган өлкөнүн мурдагы тышкы иштер министри жана мурдагы элчи, оппозициялык “Атажурт” кыймылынын теңтөрайымы Роза Отунбаеванын жактоочулары бүгүн эртең менен Жогорку Кеңештин алдына пикетке чыгышты. Түшкү саат 1:30 чамасында полиция кызматкерлери "Ата Журт" кыймылынын өкүлдөрү тарабынан аянтка тигилген чатырларды бузуп, күч менен алып кетти. Андан кийин пикеттин катышуучулары митинг уюштурушуп, Акүйдү көздөй жөө жүрүшкө чыгышты.
Дагы жүктөңүз
