"Азаттыктын" Прагадагы кеңсесинин кызматкери, журналист, саясат жана экономика тармактары боюнча адис. Кыргыз улуттук университетинин журналистика факультетин аяктаган.
Демократиялык партиянын АКШ президенттигине талапкери, сенатор Барак Обама кечээ Иракка келди. Мунун алдында ал Ооганстанга барган эле. Ушул апта ичи Обама ошондой эле Иордания, Израил, Германия, Франция, Британияда болот. Жакынкы Чыгыш жана Европа өлкөлөрүн кыдыруу - мамлекет башчылыгына талапкер үчүн америкалык шайлоочуларга эл аралык маселелер боюнча өз жөндөмүн көргөзүүнүн бир мүмкүнчүлүгү. Анткен менен Барак Обаманын кээ бир, өзгөчө Ирактан америкалык аскерлерди он алты айдын аралыгында чыгарып кетүү жөнүндөгү убадасынан улам анын чет элге сапары жаңы карама-каршылыктарды жаратты.
Британ өкмөт башчысы Гордон Браун Израилди Иордандын Батыш жээгинде конуштарды курууну токтотууга жана палестиналыктардын ары-бери каттоосу үчүн киргизилген чектөөлөрдү жеңилдетүүгө чакырды. Кечээ Палестинада болгон учурунда британ премьер-министри автономиянын өкмөтүнө кошумча каражат жана полиция күчтөрүн даярдоодо жардам берүүнү убада кылды. Ал бүгүн Израилдин парламентинде сөз сүйлөйт.
Грузия жикчил аймагы катары эсептеген Абхазияга бүгүн немец тышкы иштер министри Франк Вальтер – Штайнмайер келет. Кечээ ал Тбилисиде жана Батумиде грузин жетекчилиги менен сүйлөшүүлөрдү өткөрдү. Германия грузин –абхаз жаңжаалын жөнгө салуу боюнча жаңы тынчтык планын сунуш кылып жатат. Немец дипломатиясынын башчысы Грузия менен катар иш сапары учурунда Абхазияны жана аны колдогон Орусияны жаңы планды кабыл алууга ынандыруу аракетин жасамакчы.
Пакистандагы ич ара атаандаш жихадчы топтор коңшу Ооганстанда НАТО жана АКШ күчтөрүнө каршы биргелешип күрөшүүнү макулдашкан. Бул тууралуу "Ассошейтед Пресс" агенттиги кабарлады. Мындай макулдашуу чын эле орун алса, андан Ооганстандын чыгышындагы коопсуздук кырдаалына кандай таасир тийиши мүмкүн?
Европа менен Жакынкы Чыгышка сапарга чыгардан бир апта алдыда АКШ президенттигине талапкерлердин бири Барак Обама Вашингтондо тышкы саясаттын маселелерине арнап, атайын сөз сүйлөдү. Демократиялык партиянын өкүлү, эгер мамлекет башчылыгына шайланса, Ирактан америкалык аскерлерди он алты айда чыгарууну, көңүлдүн көбүн Ооганстанда "ал-Каида" менен Талибанга каршы күрөшкө бурууну, дипломатияга артыкчылык берүүнү, Кошмо Штаттардын дүйнө боюнча карым-катнашын кайра тикелөөнү убада кылды.
Тажикстанда соңку айларда өлкөдөгү жумушсуздукка, коррупцияга, электр жарыгы менен газдын таңкыстыгына ичи чыкпаган жергиликтүү тургундардын бир нече нааразылык акциялары өттү. Ошол эле учурда көз карандысыз гезиттер да өлкө жетекчилигин барган сайын катуу сындашууда. Калк да, маалымат каражаттары да бийликтин репрессиясынан чоочулап келген Тажикстан үчүн бул - адаттан тыш көрүнүш. Бирок адамдар азыр жогото турган эч нерсеси жок экенин айтышууда.
Испания борбору Мадридде ушул аптада диндер аралык диалог өтөт. Баш кеңсеси Меккеде жайгашкан Дүйнөлүк Мусулман лигасы уюштуруп жаткан жыйынга мусулман, христиан, жөөт жамаатынан эки жүзгө чукул таанымал инсандар, дин аалымдары катышары күтүлүүдө. Бир эле учурда үч диндин өкүлдөрүнүн катышуусунда сейрек өтүүчү жыйынында эл аралык кызматташтык, адам укуктары, дүйнөдө коопсуздукта жана тынчтыкта жарнакташып жашоо маселелери талкууланат.
Түндүк Корея өзөктүк жайларын керектен чыгаруу боюнча иштерди быйыл октябрь айынын соңуна карата аяктоого жана алардын жабдуулары ажыратылып, алынганын тыштан келүүчү эксперттер текшерүүсүнө негизинен макул болду. Түндүк Кореянын өзөктүк программасы боюнча алты тараптуу сүйлөшүүлөрдүн Пекинде өткөн кезектеги айлампасы ишемби күнү мына ушундай келишим менен аяктады. Инспекциянын убактысы жана майда–чүйдөсү алдыда такталышы керек.
Өзбекстанда ок–дары жана артиллериялык снаряддар сакталган кампадагы өрт жана андан кийинки жарылуулардан улам Бухаранын жанындагы Каган шаарынын калкы убактысынча көчүүгө мажбур болду. Каза тапкандар менен жабыр таркандар тууралуу так маалымат жок.
Франциянын энергетикалык ири компаниясы – Тотал (Total) Ирандын Түштүк Парс газ кенин иштетүү долбоорунан чыгуу чечимине келгенин жарыялады. Муну менен аталган газ кенин өздөштүрүү бир нече жылга токточудай. Француз компаниясынын кетиши ошондой эле Иран экономикасына жана энергетикалык индустриясына урулган дагы бир сокку катары каралууда.
Иран алыс жана орто аралыкка учуучу ракеталарынан тогузду ийгиликтүү сынаганын кечээ жарыялаган эле. Бул жаңылыкка байланыштуу "Азаттык жана Эркин Европа" радиосунун кабарчысы Жереми Бранстен (Jeremy Bransten) "Jane's Missiles and Rockets" журналынын редактору, ракеталар боюнча адис Дуг Ричардсонго (Doug Richardson) айрым суроолор менен кайрылды.
Ушул дүйшөмбү күнү Индиянын Пакистандагы элчилигине кол салынган эле. Бул окуя Индиянын Ооганстандагы кызыкчылыктары менен аракеттерине, коңшусу Пакистан менен атаандаштыгы бул өлкөдө кандай жүрүп жаткандыгына көңүл бурдурду.
Ушул дүйшѳмбүдѳ Сербияда жаңы өкмөт бекитилди. Өкмөттө эми Сербиянын Евробиримдик менен тыгыз алакасын жактаган партиялардын блогу менен алардын саясий оппоненти - социалисттер бирге иштешет. Коалиция түзгөн өнөктөштөр Косово боюнча туруму окшош экенин жана жаңы өкмөт мурдагы провинциянын көз карандысыздыгын эч качан тааныбай тургандыгын билдирүүдө. Евробиримдик батышчыл багыттагы өкмөттөн куралышын кубаттап, зарыл реформаларды жүргүзүүгө чакырды.
Чоң сегиздин тобуна кирген өлкөлөр 2050-жылга карата көмүр кычкыл газынын абага бөлүнүшүн бери дегенде 50%га кыскартууга жетишүүнү макулдашты. Бул тууралуу Чоң сегиздин лидерлеринин быйылкы саммитинин экинчи күнүндө жарыяланды. Мунай жана азык-түлүк баасы кымбаттоосуна байланышкан тынчыздануулар үстөмдүк кылган саммит Жапониянын Хоккайдо аралындагы Тояко курортунда өтүүдө.
Грузия жикчил аймагы катары эсептеген Абхазия соңку жарылуулардан кийин Грузия менен де-факто чек арасындагы өткөөл бекеттердин баарын белгисиз мөөнөткө жаап салды. Жарылуулардын экөөсү курорттук Гагра шаарында, үчүнчүсү борбор Сухумиде болгон эле. Андан баш-аягы он эки киши жаракат алган. Бул окуялар эки ортодогу ишенбөөчүлүктү кайрадан күчөткөнсүдү.
Арменияда бүгүн, 4-июлда оппозиция кезектеги митингин өткөрөрү күтүлүүдө. Бул армян оппозициясынын соңку жарым ай ичиндеги үчүнчү демонстрациясы болот. Талдоочулар соңку окуяларды өлкөдөгү саясий кризис жөнгө салына электигин, атүгүл азыркы жай менен алдыдагы күздө уланарынын ачык белгиси катары баалап жатышат.
Грузия өзүнүн жикчил аймагы катары эсептеген Абхазияда соңку күндөрү үч жарылуу болду. Акыркысы кечээ эртең менен Грузиянын Абхазия менен де-факто чек арасына жакын жерде орун алды. Андан эч ким жабыр тарткан жок, бирок Абхазиядагы орус аскерлери муну Тбилисинин провакациясы катары мүнөздөдү. Жарылуулардын артында эмне жатышы мүмкүн?
Дүйнөлүк Саламаттыкты сактоо уюму кургак учуктун өзгөчө түрүнө каршы натыйжалуу күрөшүү боюнча жаңы демилге менен чыкты. Уюмдун ал демилгеси курагак учуктун дары –дармекке туруштук берген түрүн тезирээк аныктоо жана ага чалдыкан адамдарды туура жана натыйжалуу дарылоого багытталган. Бул ириде ички мүмкүнчүлүгү чектелүү өлкөлөрдө аталган илдет жайылып кетпөөсүн алдын алууну максат кылат.
Кытай бийлиги менен Тибеттин сүргүндөгү рухий жолбашчысы Далай Ламанын өкүлдөрү ортосунда сүйлөшүү улантылган жатат. Сүйлөшүүлөрдүн кезектеги айлампасы ушул шейшемби, шаршемби күндөрү Пекинде өтөөрү белгиленген. Окуя кытай башкааласында Олимпида оюндары ачыларынын алдына туура келип олтурат. Ошондой эле бул жаңылык белгилүү болгон учурда Кытайда иш сапары менен АКШ Мамлекеттик катчысы Кондолиза Райс жүргөн эле.
Грузия, Украина, Азербайжан, Молдованын башын бириктирген ГУАМ уюмунун кезектеги саммити 1-2-июль күндөрү Грузиянын Кара деңиз жээгиндеги Батуми шаарында өткөн жатат. Саммиттин быйылкы урааны "ГУАМ- Европанын Чыгышын бириктирүү". Бирок батышчыл багыттагы бул бирикмеден чыгуусу үчүн Орусиянын кысымына кабылган Молдованын президенти Владимир Воронин жыйынга келбей тургандай.
Дагы жүктөңүз
