Дмитрий Песков: Биз оор жоготууга учурадык
Орусиянын президенти Путиндин басма сөз катчысы Дмитрий Песков Украинада чоң жоготууга учураганын Sky News каналына курган маегинде моюнга алды. Анткен менен Песков жоготуунун так санын айткан эмес.
25-мартта Орусиянын Коргоо министрлиги согушта 1351 орусиялык аскер каза таап, дагы 3825и жараат алганын билдирди. Кремл андан бери жоготуулары жөнүндө үн ката элек.
Орусиянын жаңы авиасоккусу
Харьков облусундагы Барвенково шаарына жасалган авиасоккудан улам Славянск, Краматорск жана Лиманга карай эвакуациялык рейстер токтотулду. Бул тууралуу Украин темир жолунун башчысы Александр Камышин билдирди. Славянск жана Краматорскто үч эвакуациялык темир жол курамы бөгөттөлгөн.
Молдованын парламенти георгий тасмасына, "Z" жана "V" символдоруна тыюу салды
Орусиялык аскерлер Украинада колдонгон символиканы демонстрация кылган адамдар 9000 лей, юридикалык жактар 18 000 лей айып төлөйт. Бул мыйзам долбоорун Молдованын парламентинде коммунисттер өткөрбөгөнгө аракет кылышты.
Британиялык Pink Floyd рок-тобу 1994-жылдан бери биринчи жолу "Hey Hey Rise Up" аттуу ырын жазып, синглди сатуудан түшкөн акчанын баары Украинага гуманитардык жардамга жумшаларын жарыялады.
Композицияга буга чейин Киевдин аймактык коргонуусунун катарына кирген украиналык "Bумбокс" тобунун лидери Андрий Хлывнюктун вокалдары колдонулган. Pink Floyd синглдин аталышы Хлывнюктун аткаруусундагы ырдын саптарына тиешелүү: "Биз ошол кызыл калинаны көтөрөбүз! Биз Украинабызды даңктайбыз!".