Украин президенти Владимир Зеленский АКШнын президенти Дональд Трамп менен сүйлөшкөнүн 11-октябрда билдирди.
"Жакшы, мазмундуу сүйлөшүү" болгонун белгилеген украин президенти Трампты Жакынкы Чыгышта атышууну токтотууга жетишкени менен куттуктаганын айтты:
"Бул олуттуу натыйжа. Бир аймакта согушту токтотуу мүмкүн болгон соң, албетте, башка согуштарды да, анын ичинде Орусиянын согушун да токтотсо болот чыгар. Мен президент Трампка Орусиянын биздин энергетикалык системабызга жасап жаткан чабуулдары тууралуу айттым. Анын бизге колдоо көрсөтүү ниетин мен баалайм. Биздин абадан коргонуубузду бекемдөө мүмкүнчүлүктөрүн, аны камсыздоо боюнча конкреттүү келишимдерди талкууладык. Биздин позицияларды бекемдөө жаатында жакшы варианттар жана идеялар бар. Орус тарап чыныгы дипломатияга даяр болушу керек — буга күч менен жетишсе болот".
Ак үй же Трамп өзү бул тууралуу азырынча маалымат берише элек.
Эки лидердин жеке жолугушуусу өткөн айда болгон. Анда тынчтыкты жакындатуу боюнча идеялар талкууланганын Зеленский билдирген.
Трамп согушту токтотуу үчүн Зеленский менен Путин жолугушуусу зарыл деген оюн айткан.
11-октябрга караган түнү Орусия Украинанын аймагын 78 согуштук дрон менен аткылаганын, анын 54ү жок кылынганын өлкөнүн Куралдуу күчтөрү билдирди.
Днепропетров облусунун Никопол шаарында бир киши каза тапты, бир нече жергиликтүу тургун жараат алды.
Чернигов облусунда жума күнкү соккудан жергиликтүү энергетикалык ишкананын кызматкери каза болгону, андан тышкары бир нече киши жараат алганы кабарланды. Ишемби күнү ушул эле облуста ишканалардын биринин имараты зыян тартты.
Одесса облусунда 11-октябрда Орусиянын чабуулдарынан кийин 44 калктуу пункт электр жарыгысыз калган. Кечке чейин 290 миң үй-бүлө жарык менен камсыз болгону, дагы 300 миңдейи электрсиз отурганы маалымдалды.
Дрон чабуулуна кабылганын Орусия да билдирүүдө. Волгоград облусунун жетекчилигинин маалыматына караганда, 11-октябрга караган түнү Украина учкучсуз учактар менен жапырт чабуул койду, натыйжада көп кабаттуу үйлөрдүн үчөөндө, мектепте жана бала бакчада терезелер талкаланды, бир киши жараат алды.
Уфа шаарында мунай иштетүүчү "Башнефть-УНПЗ" заводу бутага алынганын "РБК-Украина", "Суспильне" жана "Украинская правда" украин атайын кызматындагы булактарына таянып жазышты. Заводдо жарылуу болгону маалымдалып, үстүн кара түтүн каптаган сүрөттөр социалдык түйүндөргө жарыяланды. Ушул эле ишкана бир ай мурда да чабуулга кабылган.
Орусиянын Коргоо министрлиги 11-октябрда эртең менен жарыялаган маалыматында Украина учурган 42 согуштук дрон Волгоград, Ростов, Ульяновск, Воронеж, Башкырстан, Саратов аймактарында жок кылынганын билдирди.
Орус аскерлери Украинанын энергетикалык инфраструктурасына 10-октябрга караган түнү да жапырт сокку урганын өлкөнүн Энергетика министрлиги билдирди.
Украинанын баш калаасынын бир бөлүгү электр энергиясы жана суусу жок калды. Өлкөнүн айрым аймактарында да авариялык өчүрүүлөр болуп жатат.
Президент Владимир Зеленский өлкө боюнча 20дан ашуун адам жараат алганын жана бир бала каза болгонун билдирди.
Киев шаарынын мэри Виталий Кличко Орусиянын соңку чабуулунда бери дегенде тогуз адам жараат алганын билдирди. Анын ырасташынча, беш адам ооруканага жеткирилди.
"Шаардын сол жээгиндеги маанилүү инфраструктурага жасалган Орусиянын жапырт чабуулунан улам бул аймак азыр электр жарыгысыз калды. Ошондой эле суу менен камсыздоо үзгүлтүккө учурады. Печерск районунда дрондун сыныгы көп кабаттуу үйгө кулады. Бир канча кабатта батирлерде өрт чыкты. Өрт өчүрүлдү",-деп жазды Кличко Телеграм каналына.
Кличко ошондой эле шаардын дагы бир канча районунда көп кабаттуу үйлөр жабыркаганын кошумчалады.
Орусия мындай соккулар тууралуу адатта комментарий бербейт.
Ал арада Украина менен чектеш Белгород облусунун губернатору Вячеслав Гладков бул аймакка жасалган дрон чабуулунда сегиз жашар кыз жараат алганын билдирди. Ал социалдык тармактагы баракчасына Новая Таволжанка айылындагы бир жер там жабыркаганын, башынан жараат алган кыз оор абалда ооруканага жеткирилгенин жазды.
Согуш маалында бул маалыматтарды бейтарап булактардан ырастоо мүмкүн эмес.