Кыргызстандын Бириккен Улуттар Уюмундагы (БУУ) туруктуу өкүлү Миргүл Молдоисаева БУУнун өнүктүрүү программасынын (UNDP) администратору Ахим Штайнер менен кыргыз-тажик чек арасындагы кризисти талкуулады.
4-майдагы жолугушууда Молдоисаева чек арадагы куралдуу жаңжалдагы курмандыктар жана зыяндар тууралуу маалымат берип, Баткен облусун калыбына келтирүүгө көмөктөшүүнү өтүндү.
Штайнер эки өлкөнүн ортосундагы чырды саясий жана дипломатиялык жол менен чечүү аракетин кубаттап, UNDP элдин жашоосун өнүктүрүүдө Кыргызстандын ишенимдүү өнөктөшү бойдон кала берерин билдирди.
Молдоисаева 30-апрелде БУУнун баш катчысынын саясий маселелер боюнча жардамчысы Мирослав Йенча менен жолугушуп, жогорудагы маселени талкуулаган.
30-апрелде тышкы иштер министри Руслан Казакбаев БУУнун башкы катчысынын Борбор Азия боюнча атайын өкүлү Наталья Герман менен телефон аркылуу сүйлөшкөндө Кыргызстан БУУдан жардам күтөрүн айткан.
Өкмөттүн Баткен облусундагы ыйгарым укуктуу өкүлү болуп дайындалган Абдикарим Алимбаев "Азаттыкка" маек куруп, чек арадагы эл менен жеринде, тыгыз иш жүргүзүлөрүн билдирди. Баткен облусунун жетекчиси кыргыз-тажик чек арасында ондогон адамдын өмүрүн алган жаңжалдан кийин алмашты. 48 жаштагы Алимбаев буга чейин Чек ара кызматынын төрагасы жана анын орун басары болуп иштеген.
Орус президенти Владимир Путин менен Тажикстандын президенти Эмомали Рахмон 8-майда Москвадагы жолугушуусунда кыргыз-тажик чек арасындагы соңку жаңжалды талкуулашат. Бул тууралуу Орусиянын мамлекеттик "РИА Новости" жаңылыктар агенттиги Кремлдин басма сөз катчысы Дмитрий Песковго шилтеме кылып кабарлады.
Маалыматка ылайык, Тажикстандын президенти Кызыл аянттагы Жеңиш парадына да катышат.
"ТАСС" жаңылыктар агенттиги Песковго шилтеме кылып жазгандай, Рахмон менен Путиндин сүйлөшүүлөрү кыргыз-тажик чек арасында жаңжал чыкканга чейин эле пландалган. Бирок Песков кыргыз президенти Садыр Жапаров Жеңиш парадына карата Москвага келбей турганын айткан.
Тажикстан жана Орусиянын башчылары чек ара жаңжалын талкуулай турганын тажик президентинин басма сөз кызматы “Озоди” радиосуна ырастады.
Кыргызстанда президент Садыр Жапаров Москвадагы Жеңиш парадына катышары же катышпай турганы тууралуу расмий маалымат азырына боло элек.
Бириккен Улуттар Уюмунун (БУУ) Адам укуктары боюнча Жогорку комиссары Мишель Бачелет кыргыз-тажик чек арасындагы куралдуу жаңжалда курман болгон кыргызстандыктар үчүн терең кайгыруусун билдирди.
Кыргызстандын БУУдагы жана башка эл аралык уюмдардагы туруктуу өкүлү, Женевада иш алып барган Данияр Мукашев 4-майда Бачелет айым менен чек арадагы кризисти талкуулады.
Мукашев 28-30-апрелде Кыргызстан менен Тажикстандын чектеш аймагындагы коога тууралуу маалымат бергенин Тышкы иштер министрлигинин басма сөз кызматы кабарлады.
Кыргызстандын өкүлү калабада курман болгон кыргызстандык 36 адамдын басымдуу бөлүгү жөнөкөй жарандар экенин, арасында 5 жана 12 жаштагы балдар бардыгын белгилеп, талкаланган турак жайлар тууралуу айтып берди.
Мукашев тажик тарап эл аралык милдеттенмелерди бузуу менен кыргызстандыктардын укуктарын, анын ичинде жашоого болгонун укугун бузганын айтты. Ошол эле учурда Кыргызстанда чек ара маселелерин согуш жолу менен эмес, тынчтык ыкмасындагы сүйлөшүүлөр аркылуу чечүүгө кызыкдар экенин кошумчалаган.
Мишель Бачелет кыргыз-тажик чегиндеги жагдайга башынан бери кылдат байкоо салып келатканын билдирип, кыргыз өкмөтүнүн чырды ырбытпоого жасаган аракетин кубаттады. БУУнун Адам укуктары боюнча Жогорку комиссарынын башкармалыгы эки өлкөдөгү кырдаалды өзгөчө көзөмөлгө аларын айтты.
28-30-апрель күндөрү кыргыз-тажик чек арасындагы куралдуу жаңжалда 36 кыргызстандык курман болуп, 180ден ашууну жараат алды. Тажикстанда 20 киши көз жумганын, 90дой киши жарадар экенин "Азаттыктын" тажик кызматы кабарлаган.