Амирбек Азам уулу

Автору Амирбек Азам уулу

• Июль 27, 2006

  ЛИВАН ЖАҢЖАЛЫ БОЮНЧА 14 ӨЛКӨ ОРТОСУНДА МУНАСА БОЛБОДУ

  Ливан чатагын жөндөө боюнча кечээ Римде шашылыш өткөрүлгөн эл аралык жыйын ийгиликсиз аяктады. Анын катышуучулары эки жумадан бери жүрүп жаткан урушту токтотууга чакырышты. АКШнын Мамкатчысы Кондолиса Райс согуш биротоло токтотулуп, “буга чейинки жагдай кайталанбаш керек” экенин айтты. Жыйынга Евробиримдик, АКШ, Россия, Араб өлкөлөрүнүн болуп, 14 тышкы иштер министр, БУУнун башкатчысы Кофи Аннан, Дүйнөлүк банктын жана Евробиримдиктин өкүлдөрү катышты.

• Июль 26, 2006

  БАГДАДДЫН КООПСУЗДУГУ ВАШИНГТОНДУН КОЛУНДА

  АКШ президенти Жорж Буш Ирактын премьер-министри Нури Камил Малики менен кездешип, Багдадда токтобой жаткан жаатчылык согушуна каршы күрөшүүнүн жаңы планын талкуулашты. Кездешүү шейшемби күнү Ак Үйдө өттү. Буштун сөзүнчө, эки лидер Израил менен Ливанда жайгашкан Хизболланын күчтөрүнүн ортосундагы согуш боюнча алардын көз караштарындагы айрымачылыкты да “ачык” талкуулашты.

• Июль 25, 2006

  ИРАК ЛИДЕРИ ЖААТТАШТЫК СОГУШУН ТОКТОТУУ АРАКЕТИН КӨРҮҮДӨ

  Бүгүн (25-июлда) Ирактын өкмөт башчысы Нури Камал Малики Вашингтондо Кошмо Штаттардын президенти Жорж Буш менен кездешет. Ак Үйдүн өкүлүнүн маалымдашынча, жолугушууда эң алдың - премьер-министр Маликинин ирактык суннилер менен шииттер ортосундагы жаатчылык согушун токтотуу планын аткаруу маселеси талкууланат. Бир ай мурда бекитилген коопсуздук планы азырынча ийгиликсиз болууда жана Иракта кандуу калабалар күн сайын кайталанууда.

• Июль 24, 2006

  КАРАПАЙЫМ ИРАКТЫКТАР БОМБА ЧАБУУЛУНУН КУРМАНДЫГЫ БОЛУУДА

  Иракта кандуу калабалар уланууда. Жекшемби күнү Багдадда жана түндүктөгү Киркук шаарында автомобилге коюлган бомбалардан бери дегенде 56 киши набыт болду. Андан бир күн мурда премьер-министр Нури Малики түзгөн Элдешүү комитети өлкөдөгү жаатташтык согушун токтотуу, диний жана саясый топторду бириктирүү максатында биринчи жыйынына чогулган эле. Акыркы кездери бомба чабуулунан көбүн эсе ирактык шииттер жапа чегишүүдө.

• Июнь 26, 2006

  ДОРРИТ ИВЕРСОН : ПСИХИКАЛЫК КЫЙНООНУН ИЗИ ӨЧПӨЙТ

  26-июнь Улуттар Уюмунун чечими боюнча уруп-кыйноолордон азап чеккен адамдарды колдоо күнү. Ага байланыштуу Данияда жайгашкан Уруп-кыйноолордон дарылоо жана аны үйрөнүү борборунун жооптуу кызматкери Доррит Ри Иверсон айым “Азаттык” радиосуна интервью берген эле. Борбор жыйырма жылдан бери Данияда баш паанек тапкан жана мурда өз мекенинде уруп-сабоолорго кабылган оорукчан жарандарды дарылайт, ошондой эле уруп-сабоонун кесепеттери боюнча медициналык изилдөөлөрдү жүргүзөт.

• Июнь 19, 2006

  18-ИЮНДА КАЗАКСТАН КОСМОСТУК ДЕРЖАВАЛАРДЫН КАТАРЫНА КОШУЛДУ

  Казакстан 18 - июнда тунгуч спутник - жандоочун орбитага учуруп, космостук державалардын дүйнөлүк элитасына кошулду. Космостук аппарат телекөрсөтүүлөрдө, сателлиттик байланышта жана маалыматтарды Казакстанга коңшулаш өлкөлөргө, анын ичинде Кыргызстанга берүүдө пайдаланылат. Казакстан, премьер-министри Д. Ахметовдун билдиришинче, болочокто космоско дагы башка жандоочуларды учурмакчы.

• Июнь 12, 2006

  ГУАНТАНАМО АБАК ЖАЙЫНДА ҮЧ ТУТКУН ӨЗ ЖАНДАРЫН ӨЗДӨРҮ КЫЙЫШТЫ

  Америкалык аскерлерге караштуу Гуантанамо абак жайында террорчу деп шектелген үч туткун өз жандарынын өздөрү кыйганы ырасмий түрдө маалымдалды. Кубанын жээгиндеги абак жайда жасалган жанкечтиликти анын башчысы, адмирал Харрис “АКШга каршы террордук согуштун уландысы” деп атады. Укук коргоочу уюмдар болсо болгон окуяны “камактагыларды сотсуз жана дайынсыз кармоонун натыйжасы” катары баалашты.

• Июнь 09, 2006

  ДҮЙНӨЛҮК ФУТБОЛ ЧЕМПИОНАТЫНЫН ЖАҢЫЛЫКТАРЫ

  Дүйнөнүн футбол боюнча 18-чемпионаты бүгүн Мюнхен шаарынынын Олимпиадалык стадионунда Германия жана Коста Риканын командаларынын беттешүүсү менен ачылат. Беттешүү жергиликтүү убакыт боюнча саат 18-де же Кыргызстан убактысы боюнча саат 22де башталат.

• Июнь 07, 2006

  ВАШИНГТОНДУК ЭКСПЕРТ АНДРЕС ОСЛАНД ДОЛЛАРДЫН КЕЛЕЧЕГИ ЖӨНҮНДӨ

  Акыркы эки айда АКШ доллары тышкы рынокто бир кыйла кубатынан тайды. Айрым эксперттердин айтымында, бакубат өлкөлөр Кошмо Штаттары менен Кытай ортосундагы соода балансын теңдөө үчүн доллар арзандай берсин деп чечишкен. Доллардын мурдакы советтик өлкөлөрдүн экономикасына тийгизчү таасири жөнүндө “Азаттыктын” кабарчысы Жулия Корвин Вашингтондогу Эл аралык экономика институтунун илимий кызматкери Андрес Осланд менен маектешкен.

• Май 29, 2006

  ИРАН ООГАНСТАНГА ТЕМИР ЖОЛ САЛЫП БЕРЕТ

  Жекшемби күнү Ооганстандын президенти Хамид Карзай Ирандагы эки күндүк сапарын аяктады. Карзайдын сапары учурунда Герат шаарын Ирандын Хорасан провинциясы менен туташтырган темир жолду куруу, инвесторлорго көмөктөшүү, кылмышкерлерди алмашуу, маданий кызматташууну жакшыртуу сыяктуу болуп, бардыгы жети келишимге кол коюлду. Эки өлкөнүн лидерлери Тегерандагы жолугушууда өз ара түрдүү багыттарда кызматташууга жагдай ылайыктуу экенин белгилешти.

• Май 22, 2006

  ЧЕРНОГОРИЯ СЕРБИЯНЫ ЖАЛГЫЗ КАЛТЫРМАК БОЛУУДА

  Жекшемби күнү Черногорияда жалпы элдик референдум өттү. Ырасмий эмес эсептөөлөргө караганда, шайлоочулардын 55,3 проценти республиканын күнкорсуздугу үчүн добуш беришти. Евробримдик койгон шартка ылайык, референдумга катышкан шайлоочулардын 55 проценти конфедерациядан чыгуу үчүн добуш беришсе, черногориялыктар эми өз алдынча мамлекет болууга мыйзамдуу укук алат.

• Май 12, 2006

  АЛТЫН АКЫРКЫ ЧЕЙРЕК КЫЛЫМДА БОЛУП КӨРБӨГӨНДӨЙ КЫМБАТТАДЫ

  Мунайдын баасынын тынбай жогорулашы, инфляция коркунучу, Ирандык ядролук программасына байланыштуу кооптонуулар соңку күндөрү маалымат булактары көп жазган темага айланды. Мындай жагдайда наркын жоготпос темир-алтындын куну өсүүдө. Анын баасы жыл башынан бери үчтөн бирге кымбаттап, ушу тапта бир унция же 31, 1 грамм алтындын наркы 700 доллардан ашып кетти. Бул акыркы 25 жылдагы эң кымбат баа. Анын себеби тууралуу алтын өндүрүүчүлөрдүн Дүйнөлүк алтын кеңешинин өкүлү Жилл Лилэнд айым “Азаттыкка” интервью берген.

• Май 08, 2006

  ИРАК : ЖАНКЕЧТИЛЕРДИН БОМБА ЧАБУУЛУ КҮЧ АЛУУДА

  Иракта дүйшөмбү күнкү чабуулдарда кеминде 30 кишинин өмүрү кыйылды. Жарадар болгондордун саны 70тен ашат. Шииттердин ыйык шаары Карбалада автомобилчен жанкечти жардырган бомбадан бери дегенде 20 киши курман болду. Ал эми түштүктөгү Басра шаарында күн салыштырмалуу тынч өттү. 6-майда британиялык тикучар атып түшүрүлгөндөн кийин аскерлер менен шаардык жаштар ортосунда катуу кагылышуу болуп, беш жаран жана беш аскердин каны төгүлгөн.

• Май 01, 2006

  ПРЕЗИДЕНТ БУШ ИРАКТЫН ЖАҢЫ ӨКМӨТҮ СОГУШЧАНДАРДЫ ТЫНЧЫТАТ ДЕГЕН ҮМҮТТӨ

  Иракта абал курч бойдон калууда. Америкалык аскерлер апрелде 69 жоокеринен ажырады. Бул акыркы төрт айдагы эң чоң жоготуу. Президент Жорж Буш ишемби күнкү билдирүүсүндө ирактык саясатчылардын “ал-Каиданын” жана согушчандардын коркутууларына каршы ишенимдүү турушканын жогору баалады. Өткөн жуманын башында “ал-Каиданын” Ирактагы лидери ал-Заркави террордук чабуулдар дагы күчөтүлөөрүн эскерткен. АКШнын өзүндө Ирактан америкалык аскерлерди чыгарып кетүүнү талап кылгандардын саны өсүүдө.

• Апрель 24, 2006

  БРИТАН АСКЕРЛЕРИ ООГАНСТАНДА БЕРИ ДЕГЕНДЕ ДАГЫ ҮЧ ЖЫЛ БОЛОТ

  Британ аскерлери Ооган бийликтерине өлкөнү кайра куруудагы жардамдашуусун уланта берет жана өлкөдө бери дегенде дагы үч жыл болушат. Бул жөнүндө Британиянын коргоо министри Жон Рейд жекшемби күнү Кабулда билдирди. Учурда британ аскерлерине катар нидерландиялык жана канадалык аскерлер Ооганстандын түштүгүндөгү Пакистанга чектеш тоолуу аймактарга жайгашууда. Аймак талиптер менен “ал-Каидачылардын” түнөк жайы саналат.

• Апрель 24, 2006

  ПЬЕР ДЕРОШЬЕ: ТЫШКЫ КАПИТАЛ УКУК КОРГОЛГОН ӨЛКӨГӨ БАРАТ

  Кыргызстан күнкорсуздуктун 15 жылында 2 миллиард доллардан ашуун тышкы карызга батып, бул карыздар азыр экономикага оор жүк болууда. Өндүрүштү алга жылдыруу үчүн казынада каражат тартыш. Экономика алга козголтуу үчүн тышкы жардам маанилүүбү же тышкы капиталды тартуу керекпи? Канадалык илимпоз Пьер Дерошье менен кабарчыбыз Амирбек Азам уулу уюштурган маек дал ушул маселеге арналат. Торонто университетинин доценти Пьер Дерошье экономикалык өсүүнүн негиздерин, эл аралык сооданы жана инвестициялык чөйрөнү изилдеген окумуштуу.

• Апрель 17, 2006

  АКШнын КОРГОО МИНИСТРИ РАМСФЕЛДДИ КЫЗМАТТАН КЕТҮҮГӨ ЧАКЫРГАН ГЕНЕРАЛДАР КӨБӨЙДҮ

  АКШнын Коргоо министри Дональд Рамсфелдди кызматынан кетүүгө чакырган отставкадагы генералдардын саны алтыга жетти. Бирок, өлкөнүн Куралдуу күчтөрүнүн штаб акимдеринин биргелешкен комитетинин мурдакы акими Ричардс Майерс генералдардын чакырууну согуш жүрүп жатканда жасаганы “өлкө үчүн жаман” деп, колдогон жок. Президент Буш мурдакыдай эле Рамсфелдди колдоду.

• Апрель 17, 2006

  ИРАК ПАРЛАМЕНТИНИН СЕССИЯСЫ САЯСИЙ АРАЗДАШУУДАН УЛАМ КИЙИНКИГЕ КАЛДЫ

  Ирактагы саясый кырдаал татаал бойдон калууда. Парламенттин бүгүн дүйшөмбү күнгө белгиленген жыйыны саясый партиялар ортосундагы карама-каршылыктан улам, болбой калды. Cоңку маалыматтарга караганда, кечээ жекшемби күнү жардыруулардан жана куралдуу кол салуулардан Иракта отуздан ашуун адамдын каны төгүлдү.

• Апрель 11, 2006

  ИРАНДЫН ЯДРОЛУК ЧАТАГЫ МУНАЙДЫН БААСЫН АСМАНДАТТЫ

  Ирандын ядролук программасынын тегерегиндеги чатак мунайдын эл аралык базардагы баасынын кымбаттоосуна себеп болду. Дүйшөмбү күнү кара майдын баасы 69 долларга чукулдап барып токтоду. 2005-жылдын 30-августунда АКШнын негизги мунай иштетүүчү ишканалары жайгашкан түштүк жээгин Катрина ураганы каптаганда да кара май азыркыдай кымбаттаган. Эл аралык мунай базарындагы кырдаал баалуу металлдардын баасын да өйдө көздөй түрттү.

• Апрель 10, 2006

  ПРЕЗИДЕНТ БУШТУН АЙЫБЫН ВИЦЕ-ПРЕЗИДЕНТ ЧЕЙНИНИН МУРДАКЫ ЖАРДАМЧЫСЫ АЧТЫ

  Ак Үй администрациясы Ирактын мурдакы лидери Саддам Хусейндин коркунучун ашыртып-көбүртүп, Иракка каршы согуш ачуу үчүн жалган чалгындоо маалыматын коомчулукка жарыя кылган деген кабарды президент Жорж Буш үч жылдан бери көшөрө четке кагып келген. Бирок, вице-президент Дик Чейнинин учурда тергөөдө суралып жаткан мурдакы жардамчысы берегидей жашыруун маалыматты жарыя кылууга Ж. Буш өзү уруксат бергенин айткан. Бул кабар Буштун рейтинги өтө пастап, элдин 36 проценти гана ага ишенип калган маалда ачыкка чыкты.

Дагы жүктөңүз