Кошмо Штаттар жана Батыш мамлекеттери 6-апрелде Орусияга каршы жаңы санкцияларды жарыялай турганы күтүлүүдө. Украинадагы шаарларга, жай тургундарга кол салуулары үчүн Москваны экономикалык жана технологиялык изоляцияга алуу каралууда.
Ак үйдүн басма сөз катчысы Жен Псаки жаңы пакет Орусиянын согушту улантуу үчүн ресурстарын азайтууну максат кыларын маалымдады.
Буга чейин АКШнын Финансы министрлиги Орусиянын каржылык милдеттенмелерин аткарууну кыйындаткан чараларды көргөн.
Британиянын маалыматына караганда, Батыш Орусиянын 350 млрд. доллардан ашуун валюта резервдерин пайдалануусун чектеди. Европа Биримдигинин санкцияларынын бешинчи топтомунда мунай жана көмүр экспортуна, орус кемелеринин европалык портторго кирүүсүнө тыюу салуу чаралары камтылган.
Жаңы санкциялар Киев орус аскерлери жасаган деген ырайымсыздыктын жаңы далилдерин чыгаргандан кийин кабыл алынууда. Украин президенти Владимир Зеленский шейшембиде БУУнун Коопсуздук кеңешин күнөөлүүлөрдү жоопко тартууга чакырды.
Рим папасы Франциск "Бучадагы кыргынды" айыптады. 6-апрелде Ватикандагы аудиенцияда Бучадан алынып келген желекти кармап туруп:
“Украинадагы согуш майданынан үмүт жараткан жаңылыктар эмес, Бучадагы ырайымсыздыктар өңдүү үрөй учурган кабарлар түшүүдө”,-деди.
Папа украиналык качкын балдарды кабыл алган кезде алар согуштун айынан коопсуз жай издеп үйлөрүнөн качканын, бейкүнөө кишилердин каны төгүлүп жатканын айтты.
Украин армиясы Бучаны орус аскерлери чегингенден бир нече күндөн кийин, апрелдин башында кайтарып алган. Күбөлөр жана украин бийлиги ал жерде жай тургундардын сөөктөрү табылганын айтып беришкен. Спутниктен тартылган сүрөттөрдө массалык көрүстөндөр марттын аягында эле бар болгону көрүнүп турат.
Украин президенти Владимир Зеленский муну “согуш кылмыштары”, “геноцид” деп сыпаттады.
Москва орус аскерлери Украинадагы тынч тургундарга мыкаачы мамиле кылууда деген маалыматтарды калп, чагым деп атап келатат.
Украина президенти Владимир Зеленский 6-апрелде Ирландиянын парламентине жасаган кайрылуусунда Орусияга каршы санкцияларды кабыл алуу үчүн чайпалууга убакыт жок деп билдирди. Президент "украиналыктар башынан кечирген окуялар, орус армиясы жасаган иштерден кийин чечкиндүүлүктүн жоктугуна мындан ары чыдабай турганын" айтты.
Зеленскийдин айтымында, "айрым лидерлер азыркыга чейин финансылык жоготуулар согуш жана согуш кылмыштарына караганда оорураак деп эсептешет”.
Орус армиясы чегингенден кийин Украинанын кээ бир шаарларында, анын ичинде Бучада жүздөгөн карапайым кишинин сөөктөрү табылганы тууралуу маалымат чыккан соң Батыш өлкөлөрү Орусияга каршы санкцияларды күчөтөрүн билдиришкен.
Москва орус аскерлери жай тургундарды өлтүргөн деген кабарларды "калп" жана "чагым" деп атап келатат.
Путиндин кыздарына санкция салуу маселеси каралууда
АКШ жана Европа Биримдиги орус президентинин кыздары Екатерина Тихоновага жана Мария Воронцовага санкция салууну караштырып жатканын европалык жана америкалык төрт расмий өкүл "Эркин Европа/Азаттык" радиосуна ырасташты.
Путиндин кыздары жана мурдагы жубайы Людмила узак жылдардан бери коомчулуктун назарына илинбейт. Медициналык билими бар экени айтылган 37 жаштагы Воронцова саламаттык сактоо тармагына инвестиция салган компаниянын кожоюндарынын бири. Орус басылмалары ал Нидерланд жаранына турмушка чыкканын жазышкан. Бирок алар дагы деле чогуу жашап жатканы белгисиз.
35 жаштагы Тихонова 2010-жылы көпчүлүккө акробатикалык рок-н-ролл менен алектенген бийчи жана спортчу катары таанылган. Ал кийинчерээк Москва мамлекеттик университетинде илимий изилдөө борборун курууну көздөгөн, орус өкмөтү колдогон "Иннопрактика" фондун жетектеп калган. Тихонова Путиндин эски досу деп айтылып жүргөн банкир Николай Шамаловдун уулу Кирилл Шамаловго турмушка чыгып, 2018-жылы ажырашып кеткен. Путин үй-бүлөсү тууралуу маалыматты ачык айтуудан карманып келет.
Маалыматка караганда, санкциялар тууралуу чечим 7-апрелде белгилүү болмокчу.