АКШнын президенти Жо Байден 6-апрелде Вашингтондо Орусиянын Украинага басып киришине байланыштуу киргизилген санкциялардын жаңы пакети боюнча комментарий берди.
Байден санкциялардын соңку пакети орус экономикасынын акыркы он беш жылдагы пайдасынан куржалак калтырарын айтты.
“Анткени биз Орусияны жаңы үлгүдөгү өткөргүчтөрдү, кванттык технология үчүн керектүү компоненттерди, интернет операцияларын коопсуз коддоо сыяктуу технологияларды, XXI кылымда атаандаш болуу үчүн зарыл болгон нерселерди импорттоо мүмкүнчүлүгүнөн ажыраттык. Биз көп жылдар бою орус экономикасынын өсүү мүмкүнчүлүгүн бөгөттөйбүз”, - деп айтканын "Америка добушу" билдирди.
Ал Орусия рыногунан чыгып кетип жаткан жеке компанияларды да атады.
Байден жаңы киргизиле турган санкциялар туурасында да айтты. “Биз толук бөгөттөлө турган мамлекеттик компаниялардын тизмесин кеңейтебиз. Бул компаниялар орус өкмөтүнүн кирешесинин негизги булагы жана Путин аны өзү үчүн жана Украинадагы согуш үчүн колдонот”, - деди. Ал орусиялык ири бизнес өкүлдөрүнө каршы дагы санкциялар боло турганын белгиледи.
Украинанын башкы дипломаты НАТОдон курал сурады
Украинанын тышкы иштер министри Дмитрий Кулеба НАТО өлкөлөрүн Киевди керектүү курал-жарактар менен камсыз кылууга чакырды. Ал Украинага учактар, абадан коргонуу системалары, ракеталар жана аскердик унаалар керек экенин 7-апрелде Брюсселде Түндүк атлантикалык аскердик альянстын тышкы иштер министрлеринин жолугушуусунун алдында журналисттерге билдирди.
"Менин күн тартибим өтө жөнөкөй. Анда үч гана нерсе бар: курал-жарак, курал-жарак жана курал-жарак. Биз Украинага жардам берүүнүн эң мыкты жолу - бул Путинди ооздуктоо үчүн жана орус армиясын жеңип чыгуу үчүн Киевди бардык керектүү нерселер менен камсыз кылуу", - деди Кулеба.
Ал расмий Киев Батыштан Орусиянын жаратылыш газына жана мунайына тыюу салууну талап кыла берерин кошумчалады.
Украинанын Коргоо министрлиги орус аскерлеринин Чернобыл атомдук-электр станциясына жанаша казган окопторунун дрондон тартылган сүрөт-видеолорун жарыялады.
Зеленский Орусия Донбасска чабуул коюуга камданып жатканын айтты
Украин президенти Владимир Зеленский 6-апрелдин кечиндеги кайрылуусунда Орусиянын күчтөрү Донбасстагы жаңы чабуулдарына камылга көрүп жатканын билдирди. Анын айтымында, учурда орус армиясы Украинанын чыгышындагы "дымагын" ишке ашыруу үчүн күчүн топтоп жатат.
Ал Батыш өлкөлөрү Бучадагы кыргынды улай жарыялаган санкциялардын жаңы пакети таасирдүү болгону менен жетишсиз экенин белгиледи.
"Эгер Орусияга каршы чыныгы сокку уруучу санкциялардын топтому болбосо, эгер бизге керектүү жана биз көп жолу сураган курал-жарактар болбосо, анда муну Орусия уруксат катары кабыл алат. Алдыга жылуу жана чабуул коюуга берилген уруксат. Донбасста кан төгүүнүн жаңы толкунун баштоо үчүн уруксат", - деди Зеленский.
Ал Киев Батыш өлкөлөрү Орусиянын мунайынан баш тартуунун жолун табышы керек экенин кошумчалады.
Украинанын вице-премьер-министри Ирина Верещук Донбасстагы жайкын тургундарды коопсуз аймактарга жер которууга чакырды.